२१औं संस्करणको फिफा विश्वकपमा नकआउट चरण प्रवेशका लागि आज समूह ई बाट ब्राजिल र कोष्टारिका भिड्दैछन्।
समूहको पहिलो खेलमा आशा अनुसारको प्रदर्शन गर्न नसकेको ब्राजिल आज सेन्ट पिटर्सवर्ग स्टेडियममा कोष्टारिकाविरुद्ध आफ्नो स्वभाविक खेल देखाउन चाहान्छ।
यता उत्कृष्ट लयमा रहेको कोस्टारिकाले पनि रूस विश्वकपको आफ्नो पहिलो खेलमा राम्रो सुरुवात गर्न सकेन। त्यसैले आज बलियो ब्राजिलविरूद्ध सवै शक्ति खर्च गर्ने कोष्टारिकाको लक्ष्य रहेको छ।
पहिलो खेलमा ब्राजिललाई स्विट्जरल्यान्डले बराबरीमा रोकेको थियो। कोस्टारिकालाई भने सर्वियाले पराजित गरेको थियो।
स्विट्जरल्यान्ड विरुद्धको पहिलो खेलमा ब्राजिलको फरवार्ड चलेको थिएन। खेलकै क्रममा घाइते भएका नेइमारले खुलेर खेल्न सकेका थिएनन्।
विपक्षी खेलाडीको प्रमुख निसानामा परेका उनी खेलअवधिभर ब्राजिलका खेलाडीमाथि गरिएका १९ फाउलमध्ये १० वटा नेइमारमाथि मात्र भएका थिए। जुन २० वर्षपछि विश्वकपको एकै खेलमा एकै खेलाडीमाथि गरिएको सर्वाधिक फाउल हो।
गोलिगाँठोमा समस्या भएका उनी प्रशिक्षणमा फर्किए पनि शतप्रतिशत फिट छैनन्। जसले ब्राजिलको टिममा आज पनि केही प्रभाव पार्नेछ।
चोटका कारण मंगलबार बीचमै अभ्यास छोडेपछि विश्वकै महंगा खेलाडी नेइमार कोस्टारिकाविरुद्धको खेलमा उपलब्ध हुनेमा द्विविधा थियो। तर, बुधबार अभ्यासमा सहभागी भएसँगै उनी कोस्टारिकाविरुद्ध मैदान उत्रने सम्भावना बढेको हो।
यद्यपी ब्राजिल पछिल्लो समय नेइमारमा मात्र भर परेको छैन। गत सिजन बार्सिलोना सरूवा भएका फिलिप कौटिन्होले स्विस टोलीमाथि आकर्षक गोल गर्दै ब्राजिललाई बराबरीमा रोकेका थिए। यस्तै थियागो सिल्भा, मिरान्डा, मार्सेलो, कासिमेरो, पाउलिन्हो जस्ता खेलाडी पनि फिट छन्।
यसअघि घरमै आयोजना गरेको २०औं संस्करणको विश्वकपमा जर्मनीसँग लज्जास्पद हार बेहोरेको ब्राजिलको अहिलेको टोली २०१४ भन्दा बलियो छ।
रियल मेड्रिडबाट खेल्ने क्यासेमिरो र बार्सिलोनाका फिलिपे काउटिन्होजस्ता राम्रा खेलाडी ब्राजिलको मिडफिल्डलाई सशक्त तुल्याउनेमा कुनै शंका छैन।
नेयमारमाथि यस खेलमा सबैको आँखा हुनेछ। अघिल्लो पटक पुरै नेयमारमाथि भरपरेको जस्तो देखिएको ब्राजिलका लागि उनको बोझ कम गर्नका लागि युवा स्ट्राइकर गयाब्रियल जिजस टोलीमा छन्।
यता कोस्टारिकाले पहिलो खेलमा सर्वियाविरुद्ध एकनासको खेल पस्केको थियो। त्यसैले आज पनि त्यही खेललाई निरन्तरता दिन उसलाई कुनै अफ्ठेरो पर्दैन।
जित हात पार्नुपर्ने अवस्थामा रहेको ब्राजिल दबाबमा रहेको र त्यसको फाइदा कोस्टारिकाले उठाउन सक्छ। कोस्टारिकाले यसअघिका विश्वकपमा बलियामा मानिएका टिमलाई हराइसकेको छ। त्यसैले ब्राजिल पछिल्लो सिकार नबन्ला भन्न सकिन्न।
कोस्टारिकाले सन् १९६० पछि भएका १० भेटमा ब्राजिललाई एक पटक मात्र पराजित गरेको छ।
कोस्टारिकाले ४ वर्षअघि इङ्ल्यान्ड, उरूग्वे र इटाली रहेको समूहबाट सनसनीपूर्ण प्रदर्शनका साथ नकआउट चरण पुग्दै क्वार्टरफाइनलसम्मको यात्रा पक्का गरेका थियो।
समूह चरणको पहिलो खेलमा कोस्टारिकाले उरूग्वेलाई ३—१ गोलले पराजित गरेको थियो भने दोस्रो खेलमा कोस्टारिकाले इटालीलाई १—० गोलले पराजित गरेको थियो ।
समूह चरणको अन्तिम खेलमा इंग्ल्याण्डसँग गोलरहित बराबरीमा रोक्दै नकआउट चरणमा पुगेको थियो।
अन्तिम १६ को खेलमा कोस्टारिका र ग्रिसबीचको खेलमा पहिलो हाफमा १—१ गोल गरेपछि पेनाल्टी सुटआउटमा ५—३ गोलले पराजित गरेको थियो।
त्यस्तै क्वाटरफाइनल खेलमा कोस्टारिका र नेदरल्याण्डस्बीचको खेल गोलरहित बराबरीमा रोकिएपछि पेनाल्टी सुटआउटमा ४—३ गोल अन्तरले पराजित भएपछि विश्वकपबाट बाहिरिएको थियो।
समूह ‘ई’ मा ३ अंक जोडेको सर्बिया पहिलो स्थानमा छ भने समान १ अंक जोडेका ब्राजिल र स्विट्जरल्यान्ड क्रमशः दोस्रो र तेस्रो स्थानमा छन् । अंकविहीन कोस्टारिका अन्तिम स्थानमा छ।
दोस्रो चरणको यात्रा सहज पार्न ब्राजिललाई आजको खेलमा जित निर्विकल्प छ। पराजित भए ब्राजिललाई दोस्रो चरण पुग्न निकै कठिन हुनेछ। र उसको पनि अर्जेन्टिनाकै हालत हुनसक्छ।
यता पहिलो खेलमा सर्बियालाई नतिजा सुम्पिएको कोस्टारिकाका लागि अन्तिम १६ को सम्भावना जीवित राख्न ब्राजिलविरुद्ध स्पष्ट तीन अंक जोड्नुको विकल्प छैन।