रसियामा जारी २१औं संस्करणको विश्वकप फुटबलमा एसियाली मुलुकको कमजोर प्रदर्शनलाई जारी राख्दै अर्को एसियाली मुलुक दक्षिण कोरिया विश्वकपबाट बाहिरिएको छ।
शनिबार रोस्तोभ एरिनामा भएको समूह एफको खेलमा मेक्सिकोसँग २-१ गोल अन्तरमा पराजित हुँदै समूहमा लगातार दोस्रो हारसँगै एसियाली महारथि कोरिया बाहिरिएको हो।
मेक्सिकोको जितमा कार्लोस भेला र जाभियर हर्नान्डेजले गोल गरे। कोरियाका लागि एचएमसनले सान्तवना गोल फर्काए।
पहिलो हाफको २६औं मिनेटमा पेनाल्टी गोलबाट अग्रता लिएको मेक्सिको पहिलो हाफ १-०ले अगाडि रह्यो।
दक्षिण कोरियाका खेलाडीले डि एरियाभित्र ह्याण्ड गरेपछि मेक्सिकोले पेनाल्टी पाएको थियो ।
दोस्रो हाफमा थप आक्रमक भएको मेक्सिकोले ६६औं मिनेटमा हर्नान्डेजको गोलबाट अग्रता दोब्बर पार्यो।
निर्धारित ९० मिनेटसम्म २-० ले अगाडि रहेको मेक्सिकोमाथि कोरियाले ९०+३ एचएमसनले गोल गरे पनि टिमलाई हारबाट बचाउन सकेनन्।
यो सँगै कोरिया विश्वकपको अन्तिम खेल अगावै बाहिरिएको छ।
पहिलो खेलमा दक्षिण कोरिया स्विडेनसँग पराजित भएको थियो।
यता पहिलो खेलमा डिफेन्डिङ च्याम्पियनलाई हराएको मेक्सिको दोस्रो चरणमा प्रवेश गरेको छ।
यसअघि अर्को एसियाली मुलुक साउदी अरेबिया समूह चरणबाटै बाहिरिएको छ। अर्को एसियाली मुलुक इरान र जापान अझै दोस्रो चरण प्रवेशका लागि प्रयासरत छन्।