कतिपयले औधी माया गर्ने कतिपयले गाली पनि गर्ने फुटबलका दुई अन्तर्राष्ट्रिय स्टार लियोनल मेसी र क्रिस्टियानो रोनाल्डोका देश जारी विश्वकपबाट बाहिरिसकेका छन्।
उनीहरू दुबैका टोली शनिबार नकआउट चरणका खेलबाट बाहिरिएका हुन्।
मेसी र रोनाल्डो बाहिरिए पनि केही छैन किनकी मैदानमा अझै त्यस्ता स्टार खेलाडी बाँकी छन् जसको खेल कौशलले तपाईँलाई मन्त्रमुग्ध पार्न सक्छन्।
यहाँ त्यस्ता आठ जना खेलाडीको चर्चा गरिएको छ।
१. नेइमार
सबैको नजर यतिबेला नेयमारमा छ। बार्सिलोनाका पूर्व स्टार तथा पीएजसीको खेलाडी नेयमारसँग ब्राजिलको ठूलो अपेक्षा छ । जारी विश्वकपमा एक गोल गरेका उनी आज मेक्सिकोसँग क्वार्टरफाइल प्रवेशका लागि खेल्दैछन्।
२ .किलियन एम्बाप्पे :
१९ वर्षिय फ्रेन्च फरवार्ड एम्बाप्पेको खेल कौशल उत्कृष्ट छ। उनको गति सबैलाई चकित पार्ने खालको छ।
शनिबार राति भएको अर्जेन्टिनाविरूद्धको खेलमा उनले दुई गोल गरेका छन्। जारी विश्वकपमा उनी दोस्रो कान्छा खेलाडी हुन्। पेलेपछि विश्वकपको एकै खेलमा २ गोल गर्ने उनी दोस्रो टिनएजर खेलाडी हुन्।
३.ह्यारी केन:
इंग्ल्याण्डका कप्तान ह्यारी केन जारी विश्वकपमा ह्याट्रिक गर्ने दोस्रो खेलाडी हुन्। उनले पनामाविरूद्धको खेलमा ह्याट्रिक गरेका थिए। समूह चरणमै पाँच गोल हानेका केन गोल्डेन बुटको दौडमा अगाडि छन्।
४.रोमेलु लुकाकु:
दोस्रो विश्वकप खेलिरहेका बेल्जियन स्ट्राइकर लुकाकुले रसिया विश्वकपमा अहिलेसम्म चार गोल गरिसकेका छन्। अरू भन्दा ठूला, अग्ला र बलिया लुकाकुले जतिबेला जुनसुकै ठाउँबाट पनि गोल गर्न सक्ने क्षमता राख्छन्।
५.एडिन्सन काभानी:
रोनाल्डोको टिम पोर्चुगललाई घर फर्काएर उरूग्वेलाई क्वाटरफाइनल पुर्याउने स्ट्राइकर काभानीले महत्वपूर्ण भूमिका निभाएका थिए। पोर्चुगलविरूद्ध दुबै गोल गरेका उनी जारी विश्वकपमा तीन गोल गर्ने पाँचौ खेलाडीसमेत हुने।
अर्का स्ट्राइकर लुइस स्वारेजसँग धेरै कुरा मिल्ने काभानीको खुट्टामा बल पुग्दा दर्शकको मुटुको गति बढ्न थाल्छ। पोर्चुगलसँगको खेलमा घाइते भएका काभानीले फ्रान्ससँगको क्वाटरफाइनल खेल्ने निश्चित छैन।
६.लुका मोड्रिक :
रियल मेड्रिडबाट व्यावसायिक फुटबल खेल्ने लुका क्रोएशियाका प्रभावशाली मिड फिल्डर हुन्।
७.चकी लोजानो :
मेक्सिकोका फरवार्ड लोजानो खेलमा प्रभाव पार्न सक्ने खेलाडी हुन्। नकआउट चरणमा आज मेक्सिकोले पाँच पटकको विश्वविजेता ब्राजिलको सामना गर्दैछ।
८.डेनिस चेरिसेभ:
रसियन फरवार्ड चेरिसेभ आक्रामक छन् उनको फिनिसिङ पनि राम्रो छ। समूह चरणकातीन खेलमा उनले तीन गोल गरेका थिए।
-1746009348.jpg)
