वेस्टर्न अस्ट्रेलिया नेप्लिज फुटबल संघको आयोजनामा सञ्चालित डब्लुए नेप्लिज फुटबल लिग अस्ट्रेलियाको पर्थमा सुरू भएको छ।
ओसेनिया एजुकेसन एन्ड भिसा सर्भिसेजको मुख्य प्रायोजन रहेको यस लिगको सुरूका खेलमा गुर्खा ब्वाइजले नमस्ते एफसीलाई ९-० को भारी अन्तरले पराजित गरेको छ भने ड्रागन युनाइटेडले भाषा पाठशालालाई ५-४ ले पराजित गरेको छ।
यस्तै, अर्को खेलमा एनयुएफसीले फुएनसम युनाइटेडलाई ४-० ले मडिङटन एफसीलाई एसएफजीले र थिम्पु सिटी पर्थले जाचुङ युनाइटेडलाई पराजित गर्दै लिग चरणमा अंक बटुल्न सफल भएका छन्।
प्रतियोगिताको पहिलो हुने टिमलाई २५ सय डलर, दोस्रो हुनेलाई १५ सय डलर र तेस्रो हुने टिमलाई ७ सय पचास डलर नगद तथा ट्रफी प्रदान गरिने आयोजक संस्थाका सुवास श्रेष्ठले बताए।
प्रतियोगिताको पहिलो दिन एनआरएन पर्थका दीपक बस्नेत र नवाका बासुदेव रेग्मीले बल रेफ्रीलाई हस्तान्तरण गर्दै प्रतियोगिताको उद्घाटन गरेका थिए।
