पेट्रोलियम पदार्थको नियमन गर्ने निकाय नेपाल आयल निगमले ग्यास व्यवसायीको कमिशन बढाएको छ।
व्यवसायीको लगानी र खर्च बढेको आधारमा कमिशन बढाएको निगमका कार्यकारी निर्देशक सुरेन्द्र पौडेलले जानकारी दिए।
‘विगत ४,५ वर्ष देखि ग्यास व्यवसायीको कमिशन बढेको थिएन। अहिले उनीहरूको खर्च र लगानी बढ्दै गएपछि २८ रूपैयाँ कमिशन बढाएका छौं,’ उनले भने, ‘यस वापत निगमले वार्षिक ९६ करोड खर्च गर्ने छ।’
उनका अनुसार सो कमिशनको कार्य आज (बिहीबार)बाट लागू हुने भएको छ। उक्त कमिसन उपभोक्तालाई तत्काल भार नपर्ने गरी पेट्रोल र डिजेलको मूल्यमा समायोजन गरिने निगमले जनाएको छ।
कुन कुन शिर्षकमा थपियो कमिशन
यसअघि निगमले १ सिलिण्डर ग्यास बराबर प्रशासकीय खर्च वापत ५२ रुपैयाँ ५४ पैसा स्थानीय ढुवानी खर्च वापत २९ रुपैयाँ २० पैसा बाह्य ढुवानी खर्च ८७ रुपैयाँ प्रविधि नोक्सानमा १ रुपैयाँ ३९ पैसा, उद्योगीको कमिसन ३० रुपैयाँ ५५ पैसा र विक्रेताको कमिसन ३२ रूपैयाँ तिर्दै आएको थियो।
आजबाट ग्यास व्यवसायीको प्रशासकीय खर्चमा १३, स्थानीय ढुवानी खर्चमा ८, उद्योगीको मुनाफा २ र बिक्रेताको कमिसनमा ५.४७ रूपैयाँ (भ्याट सहित) बढेको छ।
सरकारले आफुहरूले राखेको माग पुरै रूपमा पुरा नभएको एलपी ग्यास उद्योग महासङ्घका अध्यक्ष गोकुल भण्डारीले बताएका छन्। ‘सरकारले बाह्य ढुवानी खर्च र प्राविधिक खर्च बढाएको छैन। यतिले मात्र हाम्रो माग पुरा हुँदैन’, उनले भने।
केही समय यता आफ्ना माग पूरा नभएको भन्दै ग्यास व्यवसायीले आन्दोलन गरेका थिए। सरकारले आफूले पाउँदै आएको कमिशनमा ५ रूपैयाँ मात्रै बढाउँदा पनि केही सहज भएको बिक्रेता महासंघका वरिष्ठ उपाध्यक्ष चन्द्र थापाले बताएका छन्।
‘यसअघि प्रतिसिलिन्डर कमिशन ३२ रुपैयाँ थियो। अहिले भ्याट सहित ५.४७ पैसा बढेर ३७.४७ रुपैयाँ पुगेको छ। यसले व्यवसायीलाई केही राहत पुगेको छ’, उनले भने।
