रूसले छिमेकी युक्रेनमा आक्रमण गरेको सय दिन पूरा भएको छ। रूसले गत फेब्रुअरी २४ मा युक्रेनमाथि तीन तिरबाट हमला गरेको थियो।
सुरूमा पूर्वी युक्रेनसँगै राजधानी किएभलाई पनि लक्षित गरी आक्रमण गरिएको थियो। केही दिनमै युक्रेन कब्जा गर्ने रूसको योजना सफल हुन नसकेपछि अहिले पूर्वी युक्रेनमा आक्रमण केन्द्रित छ।
यो अवधिमा दुबै देशले हजारौं सैनिक गुमाएका छन्। ठूलो संख्यामा सैन्य सामग्री र हातहतियार नष्ट भएका छन्।
शान्त र सुन्दर युक्रेन आज खण्डहरमा परिणत भएको छ।
युद्धको यो गर्मीले पूर्वी युरोप बाहिर विश्वका अन्य देशलाई पनि धेरै समस्यामा पारेको छ।
युद्धका कारण युक्रनेले ३० देखि ५० प्रतिशत कुल गार्हस्थ्य उत्पादन गुमाएको छ। हाल युक्रेनको बजेट घाटामात्रै ५ अर्ब अमेरिकी डलर पुगेको छ। विभिन्न अध्ययनअनुसार रुसी आक्रमणका कारण युक्रेनमा ६ खर्ब अमेरिकी डलर बराबरको संरचना र अर्थतन्त्रमा प्रत्यक्ष क्षति पुगिसकेको छ। त्यस्तै, दसौं हजार युक्रेनी सर्वसाधारणले ज्यान गुमाएका छन् भने १ करोड २० लाख विस्थापित भएका संयुक्त राष्ट्रसंघले जनाएको छ।
रूसी आक्रमणले युक्रेनबाट करिब ६८ लाख मानिसले देश छोड्न बाध्य भएका छन्। यो युक्रेनको कुल जनसंख्याको करिब १५ प्रतिशत हो, अर्थात्, प्रत्येक ६ जना युक्रेनमा एक जनालाई देश छोड्न बाध्य भएका छन्।
यूएनएचआरसीको प्रतिवेदनअनुसार यी ६८ लाख मानिसमध्ये करिब ३६ लाख मानिस पोल्याण्ड पुगेका छन्, जसका कारण त्यहाँको जनसङ्ख्या १० प्रतिशतले बढेको छ।
जहाँ युक्रेनको जनसङ्ख्या २०२१ मा ४ करोड ३ लाख थियो, अहिले ३ करोड ७० लाखमा झरेको छ। अर्कोतर्फ युक्रेनमा ८० लाख मानिस आन्तरिक रूपमा विस्थापित भएका छन्, जसका कारण ठूलो मानवीय संकट उत्पन्न भएको छ। संकट यति डरलाग्दो छ कि युक्रेनमा एक बच्चा हरेक सेकेन्डमा युद्ध शरणार्थी बनिरहेको छ।
रूसलाई घेराबन्दी गर्न पश्चिमी देशहरूले लगातार नाकाबन्दीहरू कडा गर्दैछन्। विभिन्न मिडिया रिपोर्टका अनुसार युद्ध सुरू भएदेखि रूसमाथि ५ हजार ८ सय ३१ प्रतिबन्ध लगाइएको छ।
जसमध्ये अमेरिकाले सबैभन्दा बढी १ हजार १ सय ४४ प्रतिबन्ध लगाएको छ। यसबाहेक ४ हजार ८ सयभन्दा बढी रुसी नागरिकलाई प्रतिबन्ध लगाइएको छ भने ५ सय ६२ संस्था र ४५८ कम्पनीलाई प्रतिबन्धमा राखिएको छ।
यस्तै बेलायतले ९६४ प्रतिवन्ध लगाउँदा स्वीटजरल्याण्डले ८८८, अष्ट्रेलियाले ८४०, युरोपियन युनियनले ७५५, बेल्जियमले ७५५, जापानले ४६५ सहित विभिन्न देशहरूले रूसमाथि कुल १०,१५९ प्रतिबन्धहरू लगाएका छन्।
युद्धको फाइदा प्रत्यक्ष रूपमा कुनै पनि देशलाई नभए पनि तत्काल युद्ध अन्त्य हुने देखिँदैन। रुसले आक्रमण रोक्ने कुनै छनक देखिएको छैन भने युक्रेनले पनि रूससमक्ष आत्मसमर्पण गर्ने सम्भावना छैन।
