नेपालगञ्जबाट जुम्ला जाँदै गरेको जीप सुर्खेतको रातानांग्लामा दुर्घटना हुँदा एक जनाको मृत्यु भएको छ।
जुम्लाको हिमा गाउँपालिका–१ का २५ वर्षीय सुरेन्द्र कुमार शाहीको उपचारका क्रममा मृत्यु भएको जिल्ला प्रहरी कार्यालय सुर्खेतले जनाएको छ।
आइतबार बिहान भे १ ज १०८४ नम्बरको बोलेरो जीप अनियन्त्रित भई सडकदेखि १०० मिटर तल खसेको प्रहरीले जनाएको छ। दुर्घटनामा चालकसहित १० जना घाइते भएको जिल्ला प्रहरी कार्यालयका प्रवक्ता प्रहरी नायब उपरीक्षक रवि रावलले जानकारी दिए।
घाइते जुम्लाको गोठिचौर गाउँपालिका– ४ का धनानन्द पाण्डे, सोही ठाउँका धर्मदत्त देवकोटाको कर्णाली प्रदेश अस्पताल सुर्खेतमा उपचार भइरहेको रावलले जानकारी दिए। दुवैजनाको अवस्था गम्भीर छ ।
यस्तै जुम्लाको चन्दनाथ नगरपालिका–७ का १८ वर्षीया नन्दा रावल, १७ वर्षीय निर्मल रावल, १८ वर्षीय प्रकाश रावल, गोठिचौर गाउँपालिका–४ का २६ वर्षीय लोकेन्द्र जैसी, ३५ वर्षीय हरिचन्द्र न्यौपाने, ६३ वर्षीय भवानी प्रसाद पाण्डे र सुर्खेतको भेरिगंगा नगरपालिका–१२ छिन्चुका ३१ वर्षीय गोविन्द सिंहको वीरेन्द्रनगरस्थित माया नर्सिङ होममा उपचार भइरहेको छ।
रावलका अनुसार उनीहरूको अवस्था समान्य छ।
