डिजेल लिएर अमलेखगञ्जबाट विराटनगर जाँदै गरेको ट्यांकर बुधबार बिहान धनुषामा फेला परे पनि डिजेल कहाँ ‘गायब’ पारियो भन्ने पत्ता लाग्न सकेको छैन।
ना४ख ४१६३ नम्बरको ट्यांकर धनुषा जिल्लाको क्षीरेश्वरनाथ नगरपालिका–१ रमदैयामा बिहान फेला परेको थियो।
लहान प्रहरीको टोलीले उक्त ट्यांकर सडकमै रोकेर राखिएको अवस्थामा फेला पारेको हो।
धनुषाको महेन्द्रनगरस्थित निगमको शाखा कार्यालयबाट करिब ४ किलोमिटर टाढा मुख्य राजमार्गमा पार्किङ अवस्थामा ट्यांकर फेला परेको हो।
‘ट्यांकर फेला परे पनि डिजेल थिएन,’ सिरहाका प्रहरी उपरीक्षक उमाप्रसाद चतुर्वेदीले भने। तेल चोरीकै लागि ट्यांकर रातारात ‘गायब’ पारिएको उनले बताए।
ट्यांकरबाट तेल कहाँ खन्याइयो भन्ने खोजीमा प्रहरी जुटेको छ। ट्यांकर भेटिएको नजिक पेट्रोल पम्प छन्। सिरहाबाट पश्चिम दौडाउँदा पनि ‘हाइवे’मा पम्पहरू छन्।
‘त्यत्रो बीस हजार लिटर डिजेल पम्पबाहेक अन्यत्र भण्डारण गर्न कठिन छ,’ चतुर्वेदीले भने, ‘कुनै पम्पमा खन्याइएको हुनुपर्छ।’
पूर्व-पश्चिम राजमार्गको लहान–४ हुलाक कार्यालय अगाडिबाट उक्त ट्यांकर अज्ञात समूहले अपहरण गरेको चालक मोरङका रामदेव यादवले प्रहरीसँग बताएका छन्।
तर, उनको भनाइ सन्तोषजनक नरहेको प्रहरीको भनाइ छ। ‘चालककै भूमिका शंकास्पद खालको देखिन्छ, यसकारण घटना केही रहस्यमय बन्न पुगेको छ,’ चतुर्वेदीले भने।
चालकले हुलाक कार्यालय नजिक ट्यांकर रोकेर विश्राम गर्दा चार-पाँच जनाको समूहमा आएका व्यक्तिहरूले आफूलाई ट्यांकरसहित अपहरण गरेको प्रहरीलाई बताएका छन्। मध्यरातमा उनले त्यहीँ ट्यांकर किन रोके भन्ने शंका प्रहरीले गरेको छ।
चालकले ‘यो टयांकर उग्रचण्डी पेट्रोल पम्प छपराडीको हो’ भनी ती व्यक्तिहरूले सोधेको प्रहरीलाई बताएका छन्।
‘हो’ भनेपछि ट्यांकर पश्चिमतिर दौडाउन लगाएको र आफूलाई बर्दिबासमा ओरालेर उनीहरू भागेको चालक यादवले बताएका छन्।
चालकले भनेजस्तो ट्यांकर अपहरण नभएको चतुर्वेदी बताउँछन्। ‘यो रहस्यमय घटना र नियोजितजस्तो देखिन्छ,’ उनले भने, ‘तेल चोरीकै लागि ट्यांकर लगिएको देखिन्छ।’
ट्यांकरमा रहेको २० हजार लिटर डिजेल स्थानीय पम्पले खरिद गरेको आशंकातर्फ प्रहरीले अनुसन्धान थालेको छ। प्रारम्भिक अनुसन्धानमा ट्यांकर सीमापारि लगिएको देखिएको छैन।
प्रहरीका अनुसार ट्यांकरमा आधुनिक ‘लकिङ’ जडान गरिएको देखिएको छ। यस्तो ‘लकिङ’ चालक र तेल व्यवसायी मिलेर तोडेको हुन सक्ने आशंका गरिएको छ।
