दाङ–२ बाट निर्वाचित प्रतिनिधिसभा सदस्य विपिन कुमार आचार्यलाई जनताका 'भयंकर' अपेक्षा पूरा गर्न सकिएला कि नसकिएला भन्ने चिन्ताले सताएको छ।
'नेपाली जनताले जुन भयंकर अपेक्षा राख्नुभएको छ, त्यसको डेलिभरी कति छिटो गर्न सक्छौं भन्ने कुराले झक्झक्याउँछ,' सेतोपाटी पडकास्टमा आचार्यले भने, 'चुनाव जितेपछि जिम्मेवारी महसुस भएको छ।'
पहिलो पटक चुनाव उठेर जितेका आचार्य आफूमा 'रिस्क टेकिङ एबिलिटी' (जोखिम मोल्ने क्षमता) भएको दाबी गर्छन्।
सांसद बनेपछि 'सरकारी काम समयमा भएन भने क्षतिपूर्ति दिनुपर्ने नियम' ल्याउने उनको चाहना छ। त्यसले सेवा समयमा नदिएर घुस खोज्ने प्रवृत्ति अन्त्य हुने उनी बताउँछन्।
'राजनीतिक यात्राले मलाई सिकाएको कुरा के हो भने, नागरिकहरू 'म्याक्रो इन्डिकेटर' बुझ्दैनन्। उहाँहरूले जनजीविकामा प्रत्यक्ष असर पर्यो कि परेन भन्ने हेर्नुहुन्छ। भान्सा कति सजिलोसँग चल्यो भन्ने आधारमा सरकारलाई तुलना गर्नुहुन्छ,' रास्वपाका सह–महामन्त्री समेत रहेका आचार्यले भने, 'जनजीविका, सुशासन र दीर्घकालीन विकासमा अबको सरकार केन्द्रित हुनुपर्छ।'
उनी नयाँ सरकार छनौटमा योग्यतालाई आधार मान्नुपर्ने बताउँछन्।
'कसैलाई पनि छ महिना मन्त्री भएर इमानदार कोसिस गरेको थिएँ भन्ने छुट छैन,' आचार्यले भने, 'इमानदार कोसिसले मात्र देश बन्दैन। इमानदारी र काम गर्न शक्ति लगाउने कुरा आधारभूत विषय हुन्। अब क्षमता प्रदर्शन गर्यो कि गरेन, त्यस आधारमा मन्त्रीहरूको काम 'इन्डिकेटर' मा मापन गर्नुपर्छ।'
कुनै मन्त्रीले मापन अनुसार काम नगरे ६ महिनामै फिर्ता बोलाउनुपर्ने आचार्यको भनाइ छ। आफू भने कसैसँग मन्त्री बनाइदेऊ भन्न नजाने उनी दाबी गर्छन्।
'कसैलाई भेटेर म पनि मन्त्रीका लागि योग्य छु भनेको देख्नुहुन्न,' आचार्यले भने, 'म योग्य छु भने मैले ठाउँ पाइहाल्छु।'
फिल्म, क्रिकेट, फुटबल र वेब सिरिज मनपराउने विपिन रास्वपा सभापति रवि लामिछाने र वरिष्ठ नेता बालेन शाहले बलिउड फिल्म 'शोले' मा जय र वीरूले एकअर्कालाई सहयोग गरेजस्तै भूमिका खेल्नुपर्ने बताउँछन्।
'शोलेमा जय र वीरूले एकअर्कालाई 'कम्प्लिमेन्ट' गर्छन्। जयको एउटा र वीरूको अर्को योगदान हुन्छ, तर गब्बर हराउन उनीहरू एकै ठाउँ आउँछन्,' विपिनले भने, 'अहिले नागरिकले हामीलाई म्यान्डेट दिएको शक्ति संघर्षमा लाग्न होइन। दुई जना मिलेर नेतृत्व लिऊ र देशलाई ड्राइभ गर भनेर दिएको हो। नागरिकले यसलाई गम्भीरपूर्वक हेरिरहेका छन्।'
सभापति रवि लामिछानेसँग आफ्नो व्यक्तिगत सम्बन्ध भए पनि प्रधानमन्त्रीका उम्मेदवार बालेन शाहसँग कमै भेट भएको आचार्यले बताए।
'भेटघाट त्यति धेरै भएको छैन। म मिडियामा आएको भाष्यका कारण कुनै पनि व्यक्तिबारे धारणा बनाउँदिनँ। म एक्लाएक्लै हुने भेटघाटमा 'भाइब क्याच' गरेपछि मात्र धारणा बनाउन सक्छु,' आचार्यले भने, 'रवि र बालेनको भने गज्जबको बन्डिङ छ।'
आचार्य सुशीला कार्की नेतृत्वको सरकारले सांसदहरूको स्वकीय सचिव हटाइदिएकोमा भने खुसी छैनन्। पाँच अर्ब रूपैयाँभन्दा बढी रकम खर्चिएर देश परिवर्तन गर्न छानिएका २७५ सांसदलाई काम गर्न टिम बनाउन राज्यले सहयोग गर्नुपर्ने उनको राय छ।
'२७५ जना मानिस, जसलाई जनताले देश परिवर्तनको जिम्मा दिएका छन्, तर हामी उसले ल्यापटप पायो कि पाएन भन्नेमा विवाद गर्दैछौं। सांसदहरूलाई सशक्तीकरण गरौं। बरू त्यसपछि उसले काम गर्यो कि गरेन हेरौं,' आचार्यले भने, 'म सांसदको स्वकीय सचिव हटाउने निर्णयमा सहमति राख्दिनँ। फरक फरक पृष्ठभूमिबाट आएका सांसदहरूलाई पूर्ण सफल बनाउन उसलाई टिम त बनाइदिनुपर्छ होला नि! सारा कुरा आफ्नो हिसाबले गर भन्नु ज्यादती हो। सांसद मात्र बनाउने तर 'टुल्स' केही नदिएर गज्जबको डेलिभरी खोज्नु सांसदप्रति अन्याय हो।'
आचार्यले फागुन २१ को चुनावमा नेकपा एमालेका महासचिव शंकर पोखरेललाई पराजित गरेका थिए। मतपरिणाम सार्वजनिक भएपछि अर्का प्रतिस्पर्धी उम्मेदवार नेपाली कांग्रेसका किरणकिशोर घिमिरेले पार्टीको सम्पर्क कार्यालयमै आएर आचार्यलाई बधाई दिएका थिए। नेकपाका उम्मेदवार निर्मल आचार्यले पनि मतगणना स्थलमै बधाई दिए।
'एमाले महासचिवका तर्फबाट भने प्रत्यक्ष रूपमा बधाई र शुभकामना पाएको छैन,' आचार्यले भने, 'व्यस्त हुनुहोला।'
हेर्नुहोस् पडकास्ट —
-1746009348.jpg)
