पाकिस्तानमा नवजात शिशु चोरेर निःसन्तान आफन्तलाई दिने एक महिला स्वास्थ्यकर्मीलाई प्रहरीले पक्राउ गरेको छ। दक्षिणपश्चिम बलोचिस्तान प्रान्तस्थित एउटा अस्पतालबाट उक्त महिलाले शिशु जन्मेको छोटो समयमा नै चोरेकी थिइन्।
शिशुको परिवारलाई उनकी आमाले जुम्ल्याहा छोरी जन्माएकोबारे कसैले नभनिदिँदा सुरुमा शिशु गायब भएकोबारे उनीहरु अनविज्ञ थिए।
शिशुको आमा होसमा आएपछि उनले अर्को शिशुबारे सोधपुछ गर्दा मात्रै अर्को एक शिशु हराएको बारे उनीहरुले थाहा पाएको बिबीसीले जनाएको छ।
गर्भवती जमिला बिबिलाई अब्दुल हमिदले उनको परिवारका सदस्य अब्दुल हमिदले बुधबार आफ्नो गाउँबाट ६० किलोमिटर टाढा लोरालाइमा रहेको अस्पतालमा लगेको प्रहरीले बताएको छ।
प्रसुतीपछि अस्पतालले जमिला बिबिको परिवारलाई एक बच्ची दिएको र उनको अवस्था ठीक रहेकाले घर लैजान सक्ने बताएको हमिदले बताए। तर जमिला बिबि भने केही दिनसम्म अर्धचेत अवस्थामा रहेकी थिइन्। सोही समयमा उनीसँगै घर लगिएको एक शिशुको मृत्यु भयो।
जमिला ठीक भएर नयाँ कुरा खोलेपछि पुरै परिवार चकित भएका थिए। ‘शुक्रबार जब बिबि ठीक भएर होसमा आइन्, उनले अर्को छोरी बारे सोधिन्। हामी सबै चकित भयौँ,’ अब्दुल हमिदले भने।
प्रहरीलाई घटनाबारे मुद्दा दायर गरेपछि उक्त रात प्रसुती कक्षमा ड्युटीमा रहेकी महिला स्वास्थ्यकर्मीलाई पक्राउ गरिएको प्रहरीले जनाएको छ।
शिशु चोरी गर्ने महिलालाई अस्पताल बाहिर लैजान अन्य दुई सहकर्मीले सहयोग गरेका थिए। बिहे गरेको १७ वर्षसम्म बच्चा नभएकी आफ्नो आफन्तलाई ति स्वास्थ्यकर्मीले शिशु दिएकी थिइन्।
प्रहरीले बच्चा चोरीमा संलग्न चारै जनालाई पक्राउ गरेको र चोरी भएकी शिशुलाई परिवारको जिम्मा लगाइसकेको छ।अधिकारीहरुले अस्पतालको कमजोर सुरक्षा व्यवस्थाका कारण घटना भएको बताएका छन्।
