कोभिड-१९ को संक्रमण देखिएपछि जापानी तटमा क्वारेन्टाइनमा राखिएको डाइमण्ड प्रिन्सेस क्रुजसिपभित्र रहेका एक नेपालीलाई भारतको नयाँदिल्ली ल्याइएको छ।
पानीजहाजभित्र रहेका भारतीय नागरिकलाई उद्धार गर्न गएको एयर इन्डियाको जहाजले ती नेपालीको पनि उद्धार गरेको नयाँ दिल्लीस्थित नेपाली दूतावासका प्रवक्ता हरि ओडारीले जानकारी दिएका छन्।
'यसबारे भारतीय दूतावासले हामीलाई जानकारी गराइसकेको छ। अहिले उद्दार गरेर ल्याइएकालाई हरियाणास्थित मानेसरमा क्वारेन्टाइनमा राखिएको छ,' ओडारीले भने।
भारतीय विदेश मन्त्रालयका अनुसार क्रुजसिपभित्र रहेकालाई ल्याएर एयर इन्डियाको जहाज बिहीबार बिहान दिल्ली आइपुगेको छ।
उक्त जहाजले ११९ जना भारतीय र पाँच विदेशीलाई उद्धार गरेर ल्याएको हो। भारतीय विदेशमन्त्री ए जयशंकरले उद्धार गरिएकामध्ये २ श्रीलंकाली, १ नेपाली, १ साउथ अफ्रिकन र १ जना पेरूका नागरिक रहेको जानकारी दिएका छन्।
उद्धार गरिएका नेपालीको परिचय भने खुलाइएको छैन। 'उहाँको पासपोर्ट विवरण हामीसँग छ तर उहाँकको अनुमति लिएर मात्र सार्वजनिक गर्छौं,' प्रवक्ता ओडारीले भने। उनले दूतावासले क्वारेन्टाइन क्याम्पसँग सम्पर्क गरेर आफ्नो नागरिकसँग सम्पर्क गर्ने प्रयास गरिरहेको उनले जनाए।
डायमण्ड प्रिन्सेसभित्र रहेका यात्रुहरूमध्ये सात सय चार जनालाई कोभिड १९ देखिएको छ भने ४ जनाको मृत्यु भइसकेको छ।
संक्रमण नफैलियोस् भनेर उक्त पानीजहाजलाई क्वारेन्टाइनमा राखिएको छ।
