विराटनगरमा सात जना प्रहरीसहित थप १४ जनालाई कोरोना संक्रमण पुष्टि भएको छ। संक्रमितमध्ये सात जना प्रहरी छन्।
बाँकी संक्रमितहरू भने विराटनगरका स्थानीय रहेको महानगरपालिकाका स्वास्थ्य कार्यालय प्रमुख रमेश कार्कीले जानकारी दिए।
विराटनगरमा गत शनिबारदेखि नै लकडाउन जारी छ। समुदायमा कोरोना संक्रमण फैलिएको भन्दै महानगरपालिकाले दुई साता लकडाउन गर्ने निर्णय गरेको हो।
लकडाउन भएपछि अहिले महानगरपालिकाले परीक्षणको दायरा पनि बढाएको छ। अहिले महानगरले संक्रमित फेला परेको ठाउँका वरिपरि सबैको स्वाब संकलन गरिरहेको छ।
आइतबारमात्र विराटनगरस्थित कोसी अस्पतालका दुई जना स्टाफ नर्स र एकजना सरसफाइ कर्मचारीलाई पनि संक्रमण देखिएको थियो।
यसअघि पनि अस्पतालका केही स्वास्थ्यकर्मीलाई संक्रमण पुष्टि भएको थियो।
त्यसयता अस्पतालको ओपिडी सेवा बन्द छ। अस्पतालका मेडिकल सुपरिटेन्डेन्ट डाक्टर चुमनलाल दासले मंगलबारदेखि ओपिडी सञ्चालनमा ल्याइने जनाए।
