तेजाव आक्रमण गर्नेलाई कडा कारबाही गर्न सरकराले अर्को सातासम्म कानुन ल्याउने भएको छ।
अब बस्ने मन्त्रिपरिषदको बैठकमा यस सम्बन्धी अध्यादेश ल्याउने अन्तिम तयारी भइरहेको कानुन न्याय तथा संसदीय मामिला मन्त्री शिबमाया तुम्बाहाङफेले सेतोपाटीलाई बताइन्।
‘कानुन आयोगले आफ्नो प्रस्ताव बुझाएको छ। सकेसम्म सोमबारको मन्त्रिपरिषदमा र सम्भव नभएमा बिहीबारको मन्त्रिपरिषद बैठकमा अध्यादेश पेश हुन्छ’ मन्त्री तुम्बाहाङफेले भनिन् ‘हामीले अधिकतम सजायको प्रस्ताव गर्छौँ, कैदको अवधि पुरा नगरी कुनैपनि बहानामा बाहिर निस्कन नमिल्नेगरी कानुन बनाउने तयारी भएको छ।’
स्रोतका अनुसार तेजाव आक्रमण गर्नेलाई २० वर्षसम्मको सजाय तोक्ने कानुन मन्त्रिपरिषदमा प्रस्ताव हुँदैछ।
अहिले अध्यादेश ल्याउन लागिएको र संसदमा लगेर प्रतिस्थापन गर्ने समयमा यसबारेमा अझै वृहत छलफल हुने उनले बताइन्। १५ वा २० वर्ष जति तोकेपनि पुरा अवधि जेल नबसी निस्किन नपाउने प्रावधान सहितको कानुन आउने उनले बताइन्।
‘हामीले विभिन्न सरोकारवालाहरुसँग र पीडितहरुसँग पनि छलफल गरेका छौँ। पीडितहरुले अधिकतम सजाय तोक्न भन्नुभएको छ’ उनले भनिन्, ‘अझैपनि यसबारेमा हामीले सुझावहरु संकलन गरिरहेका छौँ। सुझावका लागि सबैसँग आग्रह समेत गरेका छौँ।’
प्लाष्टिक सर्जन र केमेस्ट्रीका प्राध्यापकहरुसँग सोमबार छलफल गरिएको उनले बताइन्। कतिपय एसिड शरीरका लागि फाइदाजनक समेत रहेकोले हानिकारक एसिडलाई तेजावको रुपमा परिभाषित गर्न सुझाव आएको उनले जानकारी दिइन्।
भदौ २५ गते प्रधानमन्त्री केपीशर्मा ओलीले १५ दिनभित्र एसिड आक्रमण गर्नेलाई कारबाही गर्ने कानुनको मस्यौदा बनाउन कानुनमन्त्री र सम्बद्ध निकायलाई निर्देशन दिएका थिए।