बर्दिया जिल्लाका कोरोना संक्रमित एक जना क्याम्पस प्रमुखको बाँकेमा उपचारका क्रममा मृत्यु भएको छ।
मृतक ५० वर्षीय पुरुष बर्दियास्थित बबई क्याम्पसका क्याम्पस प्रमुख (विनोद अग्रवाल) हुन्।
गुलरिया नगरपालिका वडा नं. ७ का उनको शनिबार दिउँसो बाँकेस्थित भेरी अस्पतालमा मृत्यु भएको बाँकेका जिल्ला फोकल पर्सन नरेश श्रेष्ठले जानकारी दिए।
असोज ५ गते अग्रवालको स्वाब संकलन गरिएको थियो। बाँकेस्थित भेरी अस्पतालमा पिसिआर परीक्षणका क्रममा उनलाई असोज ७ गते कोरोना पुष्टि भएको थियो।
कोरोना पुष्टि भएपछि अग्रवाल होम आइसोलेसनमा बसेका थिए।
तर, अकस्मात् शनिबार मध्यान्ह १२ बजेतिर स्वासप्रश्वासमा समस्या भएपछि उनलाई दिउँसो भेरी अस्पताल लगिएको थियो।
अस्पताल ल्याएर आइसोलेसन वार्डमा लैजाँदै गर्दा उनको मृत्यु भएको बाँकेका फोकल पर्सन श्रेष्ठले बताए।
फोक्सोको क्यान्सरका बिरामी उनी विगत दुई वर्षदेखि दिल्लीस्थित राजीव गान्धी अस्पतालमा स्वास्थ्यजाँच गराउँदै आएको पारिवारिक स्रोतले जानकारी दिएको छ।
यो सँगै बाँके जिल्लामा कोरोनाका कारण मृत्यु हुनेको संख्या १३ पुगेको छ।
बाहिरी जिल्लाबाट उपचारका लागि बाँके ल्याइएकाहरूमध्ये अछाम, कैलाली र अर्घाखाँची जिल्लाका १/१ जना र बर्दिया जिल्लाका ३ जना गरी ६ जना को मृत्यु भएको छ। बाँके जिल्लाका मात्रै थप ७ जनाको कोरोनाबाट मृत्यु भइसकेको फोकल पर्सन श्रेष्ठले बताए।
