सोमबार दिउँसो मोरङको कर्सियास्थित सिटिजन्स बैंकमा हतियारसहित प्रवेश गरेको लुटेरा समूहले २१ लाखभन्दा बढी रकम लुटेर लगेको प्रहरीको प्रारम्भिक अनुसन्धानबाट खुलेको छ।
बैंकको कर्सिया शाखामा २१ लाख ७० हजार ५ सय ६३ रूपैयाँ नभेटिएको र उक्त रकम लुटेरा समूहले नै लगेको निष्कर्षमा प्रहरी पुगेको छ।
सोमबार दिउँसो हतियारसहित आएको आठ जनाको समूहले बैंक लुटपाट गरेको थियो।
‘बैंकभित्र तीन जना पसेको देखिएको छ। एक जना सेतो टिसर्ट लगाएको र दुई जनाले रातो सर्ट लगाएका छन्। पेस्तोल देखाएर सुरक्षा गार्डलाई गोली हानेपछि बैंकमा कर्मचारी काउन्टर छाडेर भागेको सिसिटिभी फुटेजमा देखिन्छ,’ अनुसन्धानमा संलग्न एक प्रहरी अधिकारीले भने, ‘काउन्टरमा लुटेरा पसेपछि सेतो टिर्सट लगाएका लुटेराले रातो गम्छामा पैसा हाल्छन् र बाहिर रातो सर्ट लगाएका अरू लुटेरालाई पनि पैसा दिन्छन्। तिनले पनि गोजीमा पैसा हालेको प्रष्ट रूपमा सिसिटिभी फुटेजमा देखिन्छ।’
जिल्ला प्रहरी कार्यालय मोरङका एसपी जनार्दन जिसीका अनुसार सोमबार राति करिब १० बजे २१ लाखभन्दा बढी रकम लुटपाट भएको बैंकले जानकारी गराएको हो।
प्रहरीले लुटपाटमा संलग्न दुई जना भारतीयसहित तीन जनालाई पक्राउ गरेको बताएको छ। पक्राउ पर्नेमा भारतको अररीया जिल्लाको शिवपुरदेखि ३२ वर्षीय सुनिल यादव, भारत गौराहाका ३५ वर्षीय विजय बहरदार र विराटनगरका ३२ वर्षीय श्याम मुखिया छन्।
प्रहरीले उनीहरूलाई भारततर्फ भाग्न लाग्दा सीमा नाकादेखि पक्राउ गरेको मोरङ प्रहरीका प्रमुख एसपी जिसीले जानकारी दिए। उनीहरू को २५ प ३८९९ नम्बरको पल्सरमा भारतर्फ भाग्न खोज्दा प्रहरीले पक्राउ गरेको थियो। प्रहरीका अनुसार चारवटा मोटसाइकलमा आएका ८ जनामध्ये तीन जनासहित एउटा मोटरसाइकल र लुटपाटमा प्रयोग भएको पेस्तोल पनि भेटिएको छ।
प्रहरीले लुटेरालाई पक्राउ गर्न खोज्दा भारतीय नागरिक विजय बहरदार फरार भएपछि बाँया खुट्टामा गोली लागेको छ। लुटपाट गरेकामध्यै बैंकभित्र प्रवेश गरेका रातो टिर्सट लगाउने विराटनगरका रहेको प्रहरीले जनाएको छ।
प्रहरीले लुटपाटमा प्रयोग गरेको कटुवा पेस्तोल खैरवनास्थित बाँस झ्याङबाट बरामद गरेको प्रहरीले जनाएको छ। सोमबार साँझसम्म बैंकले लुटपाटको असफल प्रयास भएको बताएको थियो। तर बैंकमा भएको पैसाको हिसाब गर्दा लुटेरा समूहले पैसा लगेको पुष्टि भएको हो।
मोरङका प्रमुख जिल्ला अधिकारी काशिराज दाहालका अनुसार बैंकले २१ लाख ७० हजार ५ सय ६३ रूपैयाँ लुटिएको जानकारी गराएको छ। लुटपाट भएको रकम भेटिएको छैन।
लुटेरा समूह बैंकभित्र प्रवेश गर्दा सुरक्षा गार्ड शितल कुँवरले रोक्ने प्रयास गरेका थिए। कुँवरले उनीहरूको हतियार खोस्न खोज्दा लुटेरा समूहले २ राउन्ड गोली चलायो। सुरक्षा गार्ड ३७ वर्षीय शितलको कुममा गोली लागेको छ। उनको अहिले विराटनगरस्थित न्युरो अस्पतालमा उपचार भइरहेको छ।