लेखक खगेन्द्र सङ्ग्रौलाको जीवनी ‘सन्नाटाको एउटा स्वर’ प्रकाशन हुने भएको छ। आइतबार प्रकाशन गृह बुक–हिलले पत्रकार सम्मेलनमार्फत पुस्तकको आवरण सार्वजनिक गर्दै किताब प्रकाशनबारे जानकारी गराएको हो।
उज्ज्वल प्रसाईद्वारा लिखित जीवनीमा खगेन्द्र सङ्ग्रौलाका जीवनका सम्पूर्ण आयामलाई समेट्ने कोसिस गरिएको बताइएको छ। खगेन्द्र सङ्ग्रौला नाम आफैंले उनको सग्लो परिचय दिन्छ। सृजनात्मक लेखनमा पाँच दशकअघि नै दखल राखिसकेका उनलाई बलियो प्रतिपक्षी आवाजका रुपमा आम नेपाली पाठकले स्वीकारेका छन्।
पुस्तकबारे लेखक उज्ज्वल प्रसाईले भने, 'नेपाली समाज एवम् राजनीतिले बेहोरेका अनेक उतारचढावलाई कहिले सक्रिय रुपमा संलग्न भएर, कहिले किनारामा उभिएर बुझ्ने र व्याख्या गर्ने प्रयत्न उनले गरेका छन्।'
पुस्तकबारे सङ्ग्रौलाले भने, 'मैले जीवनमा जेजति कर्म गरें, ती सबैबारे कसैले मिहिन ढङ्गले अध्ययन गर्दै मेराबारे जीवनी नै तयार पार्ला भनेर कहिल्यै सोचेको थिइनँ। जीवनी प्रकाशन हुने बेला नजिकिँदै गर्दासमेत मलाई एउटै दुविधा छ– के म जीवनी लेखिन पर्ने मान्छे हुँ?'
सङ्ग्रौलाले भावुक हुँदै थपे, 'यही समाजमा मैलेभन्दा धेरै मानेमा श्रेष्ठ र समाजोपयोगी काम गरेका कति कति मान्छेबारे अझै जीवनी लेखिएको छैन। त्यसरी सोच्दा मेरो दुविधा अझ घनिभूत बन्छ। तथापि मेरा सहृदयी पाठक र मित्रहरुले यो जीवनी लेखिन आवश्यक ठाने।'
दुविधा र संकोचबीच आफूले उज्ज्वलले सोधेका प्रश्नहरुको जवाफ दिएको उनले बताए। 'जीवनमा तीनथरीले मेरो केरकार गरे पुलिस श्रीमती र उज्वल, सङ्ग्रौलाले थपे, 'मृतक बोल्दैन, मृतकको किरिया र वार्षिकी गरिन्छ। यो किताबमा म मृतक हुँ, उज्ज्वलजी कर्ता। म कथा हुँ, कथाकार उज्ज्वल।'
खगेन्द्र सङ्ग्रौलाको जीवनी लेखिनुपर्छ भन्ने सोचेर आफूले उज्वललाई आग्रह गरेको बताउँदै समाजसेवी एवम् योगगुरु दीपक भेटवालले भने, 'अप्ठ्यारा समयमा सत्य बोल्ने आँट र तिनलाई शृङ्गार गर्ने शिल्पको संयोजन गर्न सहज छैन। खगेन्द्र सङ्ग्रौलाजस्ता थोरै स्रष्टा नहुँदा हुन् त हाम्रो कला र सृजनाको फाँट आफैंमा निरस र अपूरो हुन्थ्यो।' उनले सङ्ग्रौलाको कृति पढ्ने मात्रै होइन, सङ्ग्रौलालाई नयाँ पुस्ताले प्रेरणााको स्रोत बनाउन पनि उति नै रहेकोमा जोड दिए।
लेखक उज्वलले नेपाली साहित्य र राजनीतिमा चाख बढ्न थालेदेखि नै आफूले नियमित रुपमा पढ्दै आएका सङ्ग्रौलाको जीवनी लेख्न पाउँदा गौरवान्वित महसुस गरेको बताए।
कार्यक्रममा बोल्दै प्रकाशन गृह बुक–हिलका अध्यक्ष भूपेन्द्र खड्काले भने, 'आफ्नो जीवन र समाज अनि समयलाई नढाँटेका व्यक्तिका जीवनका उतारचढाव सधैं प्रेरक र रोचक हुन्छन्। खगेन्द्र सङ्ग्रौलाको जीवनी पनि नेपाली पाठकको प्रिय पुस्तक बन्ने अपेक्षा छ।'
पुस्तक यही चैत्र १५ गते काठमाडौंंमा सार्वजनिक गरिनेछ।
