पानामासँगको पहिलो हाफमै इंग्ल्याण्डले बनायो इतिहास
रसियामा जारी विश्वकपको २१ संस्करणको फिफा विश्वकप अन्तर्गत समूह चरणको आफ्नो दोस्रो खेलमा अहिले इंग्ल्याण्ड र पानामाबीच खेल जारी छ।
पहिलो हाफ सकिँदा पानामा निरिह देखिएको छ। इंग्ल्याण्डले पाँच गोल गरेको छ।
इंग्ल्यान्डका लागि कप्तान ह्यारी केन र स्टोनले समान २-२ तथा लिङ्गार्डले १ गोल गरे।
विश्वकप इतिहासमा इंग्ल्याण्डले यसअघि कुनै खेलमा पाँच गोल गरेको थिएन।
खेलको आठौं मिनेटमा स्टोनले गोल गर्दै सुरूवाती अग्रता दिलाएका थिए।
खेलको २१ औ मिनेटमा कप्तान ह्यारी केनले पेनाल्टीमा गोल गर्दै इङ्लिस टोलीको अग्रतालाई दोब्बर पारेका थिए ।
३६ औ मिनेटमा लिङ्गार्डले गोल गर्दै इङ्ल्याण्डलाई ३–० को स्थितिमा पुर्याए। स्टोनले ४० औं मिनेटमा व्यक्तिगत दोस्रो गोल गर्दै खेलमा४-० को अग्रता पुर्याउँदा पहिलो हाफको इन्जुरी समयमा केनले गोल थप्दै अन्तर ५-० मा पुर्याए।
समूह जी मा रहेको इंग्ल्यान्डको पहिलो खेलबाट ३ अंक जोडेको छ भने पानामा अंकबिहिन छ। इंग्ल्यान्डले पहिलो खेलमा ट्युनिसियालाई २–१ ले हराएको थियो । पानामा भने बेल्जियमसँग ३-० ले पराजित भएको थियो।