जारी विश्वकपमा कोलम्बियाले दोश्रो चरण प्रवेशका लागि आशा जीवित राख्न 'गर या मर'को अवस्थामा रहेको म्याचमा पोल्यान्डमाथि ३-० को महत्वपूर्ण जीत निकालेको छ।
आजको जीतले कोलम्बियाको विश्वकप यात्रा जारी रहने आशा बढेको छ। उसको नकआउट चरणको यात्रा सेनेगलसँगको अन्तिम खेलले निर्धारण गर्नेछ।
कोलम्बियाको विश्वकप यात्राको आशा कायमै भए पनि लगातार दोश्रो हार बेहोरेको पोल्यान्ड भने घर फर्किने निश्चित भएको छ। समूह चरणको अन्तिम खेल उसले जापानसँग खेल्नेछ।
रसियाको कजान रंगशालामा आज भएको खेलमा कोलम्बिया र पोल्यान्डको न्यूनतम लक्ष्य थियो- जीत। पहिलो खेल हारेका दुबै टोली जित्ने लक्ष्यका मैदानमा उत्रेका थिए।
खेलको सुरूबाट नै उनीहरू एकअर्का विरूद्ध आक्रमक रूपमा उत्रिए। तर अग्रता भने खेलको ४० औं मिनेटमा कोलम्बियाले लियो। कोलम्बियाका लागि ऐरि मिनाले हेड मार्फत पहिलो गोल गरे।
कोलम्बियाका अग्ला खेलाडी मध्येका एक मिनाले आफ्नो हाइटको सदुपयोग गर्दै कर्नरबाट प्राप्त अवसरलाई गोलमा परिवर्तन गर्दै कोलम्बियालाई अग्रता दिलाए। २३ वर्षिय डिफेन्डर मिनाको देशका लागि यो तेश्रो अन्तराष्ट्रिय गोल हो।
आजको खेलमा कुनै पनि टोलीका लागि हार भनेको समूह चरणबाट नै घर फिर्ती हुनु थियो। यस्तोमा कोलम्बिया थप गोल गरेर वा गोल नखाएर आफ्नो विश्वकप यात्राको आशा जीवित राख्न चाहन्थ्यो।
यस्तैमा खेलको दोश्रो हाफमा पहिलो हाफमा गरेको एक गोलका कारण आत्मविश्वासी देखिएको कोलम्बियाले पोल्यान्डमाथि निरन्तर आक्रमण बनाइ राख्यो। निरन्तर पोलिस पोस्टमा आक्रमण गरेको कोलम्बियाले दोश्रो हाफको ७० औं मिनेटमा गोल अन्तरलाई बढाउने अवसर हात पायो। ७० औं मिनेटमा प्राप्त अवसरलाई फाल्कोले गोलमा परिणत गरे र अग्रतालाई दोब्बर पारे।
दुई गोल अन्तरले हौसिएको कोलम्बियाले जीतलाई ३-० को अन्तर पार्ने मौका दोश्रो गोल गरेको पाँच मिनेट भित्र नै पायो।
यसपटक कोलम्बियाका लागि सो मौकाको सदुपयोग मिडफिल्डर जुआन काउड्राडोले गरे। उनले खेलको ७५ औं मिनेटमा गोल गरेका हुन्।
यसरी ३ गोल खाएको पोल्यान्डले खेलमा आफूलाई फर्काउन सकेन।प्राप्त एक-दुई प अवसरलाई सदुपयोग गर्न पनि ऊ चुक्यो र कोलम्बियालाई ३-० को हार सुम्पन बाध्य भयो।
समूह 'एच'को यस अघि सम्पन्न जापान र सेनेगलको नतिजा बराबरीमा टुङ्गिएको छ। समान ४-४ अंक हासिल गरेका कारण जापान र सेनेगल दोश्रो चरणका लागि बलियो अवस्थामा रहेका छन्। त्यसैले पोल्यान्ड र कोलम्बियाका लागि आज र समूह चरणको बाँकी एक खेलमा जीत निकाल्नैपर्ने दबाब थियो र त्यो महत्वपूर्ण जीत कोलम्बियाले आफ्नो पक्षमा पार्यो।
अंक तालिकामा एक अंकले पछि परेको कोलम्बियाले नकआउट प्रवेश निश्चितका लागि सेनेगललाई हराउनुपर्नेछ वा पोल्यान्डसँग जापानको हार कुर्नुपर्नेछ।यदि जापानले पोल्यान्ड विरूद्ध जीत हासिल गरेमा र सेनेगलसँग कोलम्बियाको बराबरी भएको अवस्था पनि कोलम्बियाको विश्वकप यात्रामा विराम लाग्नेछ।
समूह चरणको पहिलो खेलमा कोलम्बिया पेनाल्टीमा जापानसँग र पोल्यान्ड सेनेगलसँग १-२ गोलले पराजीत भएका थिए।
