रसियामा जारी २१ औं संस्करणको फिफा विश्वकप फुटबल अन्तर्गत आइतबार समूह चरणको दोस्रो राउण्डका खेलको समाप्तिसँगै आजबाट समूह चरणकै अन्तिम तथा तेस्रो राउण्डका खेल शुरू हुँदैछन्।
समूहको अन्तिम खेल अन्तर्गत आज पौने आठ बजे उरूग्वे र आयोजक रसिया खेल्दैछन्। सोही समयमा समूहको दोस्रो खेलबाटै बाहिरिएका साउदी अरेविया र इजिप्ट प्रतिष्ठाका लागि खेल्दैछन्।
आज रसिया र उरूग्वेबीचको विजेता समूह विजेता भएर दोस्रो चरणमा पुग्नेछ र समूह बीको उपविजेतासँग खेल्नेछ।
आजै राति पौने १२ बजे समूह बीका दुई खेल हुनेछन्। एकै समयमा हुने खेलमा स्पेन र मोरक्को तथा इरान र पोर्चुगलबीच खेल्दैछन्।
तेस्रो राउण्डका खेल समाप्तिसँगै समूह चरण पार गर्ने र समूह चरणबाटै बाहिरिने टोलीको टुंगो लाग्नेछ।
समूह ‘बी’ मा स्पेन र पोर्चुगलको चार/चार अंक साथै इरानको तीन अंक छ। यी तीन टिममध्ये दुई टिम अघिल्लो रचणमा जानेछन्। दुबै खेल हारेको मोरक्को बाहिरिसकेको छ।
कसको सम्भावना कस्तो?
स्पेनः
- मोरक्कोलाई हराएमा।
- मोरक्कोसँगको खेलमा बराबरी गरेमा।
- यदि स्पेन मोरक्कोसँग हारेमा (पोर्चुगल र इरानमध्ये कुनै एक विजेता भएमा)
पोर्चुगल
- इरानलाई हराएमा
- इरानसँग बराबर खेलेमा
- इरानसँग हारेमा (स्पेन मोरक्कोसँग बढी गोल अन्तरले हारेमा)
इरान
- पोर्चुगललाई हराएमा
- पोर्चुगलसँग बराबर भएमा (स्पेन मोरक्कोसँग बढी गोल अन्तरले हारेमा)
समूह विजेता कसरी छानिने
आज समूह ए को रसिया र उरूग्वे बिचको खेल जसले जित्छ उही टिम समूह विजेता हुन्छ।
यदि उरूग्वे र रसिया बराबरी भएमा पनि रसिया बढी गोल अन्तरका आधारमा समूह विजेता बन्नेछ।
यस्तै समूह बीमा स्पेनले मोरक्कोलाई बढी गोल अन्तरमा हराएमा समूह विजेता हुन सक्छ। पोर्चुगल पराजित भएमा र स्पेनले खेल मात्र जितेमा ऊ समूह विजेता हुन सक्छ।
पोर्चुगलले इरानलाई बढी गोल अन्तरमा हराएमा समूह विजेता हुन सक्छ। स्पेन पराजित भएमा पोर्चुगल र इरान बराबर खेलेमा पनि समूह विजेता पोर्चुगल हुनसक्छ।
यदि स्पेन र पोर्चुगल दुवै पराजित भएमा बढी गोल अन्तरले पराजित हुने टिम बाहिरिने छ।
स्पेन र पोर्चुगल दुवै टिम विजयी भए भने बढी गोल अन्तरले विजयी हुने टिम समूह विजेता बन्ने छ।
स्पेन र पोर्चुगलको अहिलेसम्म अंक, गरेको गोल र गोल अन्तर समान छ। अन्तिम खेल पछि पनि यस्तै रहृयो भने फेयर प्लेका आधारमा समूह विजेता छानिने छ। यसरी हेर्दा अहिलेसम्म स्पेनले एउटा तथा पोर्चुगलले दुईवटा पहेँलो कार्ड पाएका छन्।
जारी विश्वकपमा छनोट भएका ३२ टोलीमध्ये ८ टिम बाहिरिसकेका छन्। जसमा साउदी अरेबिया र इजिप्टले खेल्ने खेल प्रतिष्ठाका लागि मात्र हुनेछ।
दुबै टोली अंकविहीन छन्। यी दुई टोलीबीचको खेलमा जित हात पार्ने टोलीले ३ अंक बटुले पनि दुबै टोली समूह चरणबाट बाहिरिएका छन्।
मोरक्को भने यो समूहबाट बाहिरि सकेको छ। मोरक्कोले जित हात पार्दा जम्मा ३ अंक मात्र हुनेछ। सोमबारको खेलले समूह विजेता र उपविजेताको टुंगो लगाउने छ। जसले अघिल्लो चरणको प्रतिद्वन्द्वी पनि तय गर्नेछ।