रसियामा जारी २१औं संस्करणको फिफा विश्व कप २०१८ को समूह चरणको अन्तिम खेलमा जादु चलाएका अर्जेन्टिनी कप्तान लियोनेल मेसीले नाइजेरियामाथि गोल गर्दै केही रेकर्डहरू बनाएका छन्।
दुई पटकको विश्वकप विजेता तथा साविकको उपविजेतासमेत रहेको अर्जेन्टिनालाई निकै असहज र कठिन यात्रा पार गर्दै नकआउट चरण पुर्याएका कप्तान मेसीले आफ्ना लागि व्यक्तिगत केही रेकर्डहरू बनाए।
सम्भवतः अर्जेन्टिनाका लागि अन्तिम विश्वकप फुटबल खेलिरहेका मेसी ३१ औं जन्मोत्सव हालै मनाएका छन्।
सन् २०१६ मै उनले राष्ट्रिय टिमबाट राजीनामा दिएका थिए । कोपा अमेरिकाको फाइनलमा चिलीसँग पराजित भएपछि मेसीले नैतिकताका आधारमा राजीनामा दिएका थिए।
तर उनलाई पछि टिममा बोलाइयो । त्यसपछि पनि विश्वकप छनोटमा निकै संघर्ष गर्नुपर्यो। अन्तिम खेलमा इक्वेडरसँग ‘डु अर डाइ’ को अवस्थामा मेस्सीले नै ह्याट्रिक गरेर टिमलाई रूसको टिकट कटाएका थिए।
रूस विश्वकपमा पनि मेसीसहित टिमको प्रदर्शन राम्रो रहेन। पहिलो खेलमा नवप्रवेशी आइसल्याण्डसँग १–१ को बराबरी खेल्नुअघि पेनाल्टीसहित १० प्रहारमा कुनै चमत्कार देखाउन नसक्नुले नै मेसीलाई तल खसालेको थियो।
यस्तै समूह चरणकै दोस्रो खेलमा क्रोएसियासँग ३–० को लज्जास्पद हारले मेसीलाई थप समस्यामा पार्यो। तर पनि अन्तिम खेलमा भाग्यको साथ पाएर अर्जेन्टिना विश्वकपको छनोटमा जसरी दोस्रो चरण यात्रा तय भयो।
खेलको १४ औं मिनेटमा आकर्षक गोल गर्दै आफूलाई साबित गरे। तर नाइजेरियाले पेनाल्टीमार्फत ५१ औं मिनेटमा गोल फर्काएपछि मेसीलाई थप समस्यामा पार्यो।
अर्जेन्टिनालाई राउन्ड अफ सिक्सटिनमा पुग्न जितको विकल्प थिएन। मेसी सहित बाँकी खेलाडीको आशाको किरण मरेको थिएन। उनीहरु गोलका लागि जुधेका थिए ।
परिणाम स्वरुप ८६ औं मिनेट मार्कस रोजोले गोल गर्दै अर्जेन्टिनालाई जिताउँदै कप्तानलाई हिरो बनाए।
हेर्नुहोस् मेसीका केही रेकर्ड
मेसी विश्वकप फुटबलमा आफ्नो उमेरका हरेक दशकमा गोल गर्ने पहिलो खेलाडी बनेका छन् । मेसीले विश्वकपमा किशोरोवस्था, उमेरको २० को दशक र ३० को दशकमा गोल गर्दै कीर्तिमान बनाएका हुन्।
सन् २००६ को विश्वकपमा पहिलो गोल गर्दा उनी १९ वर्षे किशोर थिए। २०१४ मा गोल गर्दा २० काटेर ३० नपुगेको अवस्थामा थिए। अहिले ३१ वर्ष काटेर ३२ लाग्दा पनि उनले गोल गरे। यसरी उमेरका तीन तहमा गोल गर्ने मेसी विश्वकै पहिलो खेलाडी हुन्।
नाइजेरियाविरूद्ध १४ औं मिनेटमा मेसीले गरेको गोल रूसमा जारी विश्वकपको १०० औं गोल बन्न पुग्यो।
मेसी तीन विश्वकपमा लगातार गोल गर्ने अर्जेन्टिनाका तेस्रो खेलाडी पनि बनेका छन् ।
यसअघि डिएगो म्याराडोना (१९८२, १९८६ र १९९४) तथा गाब्रिएल बातिस्तुता (१९९४, १९९८ र २००२) ले तीन विश्वकपमा लगातार गोल गरेका थिए।
गोल गर्ने मामलामा रोनाल्डोलाई पनि पछि पारेका छन्। अहिलेसम्म ८६७ गोल गरेका मेसीले रोनाल्डोको ८६६ गोललाई उछिनेका हुन्। उनी रोनाल्डोभन्दा १४९ खेल कम खेलेका छन्।
गएरातिको गोल सँगै उनले चार विश्वकपबाट समग्रमा गोल संख्या ६ पुगेको छ। त्यसमध्ये आधा गोल त नाइजेरिया विरुद्ध गरेका छन्। उनले ४ गोल पछिल्लो ब्राजिल विश्वकपमा गरेका थिए। उनले ७ खेलबाट ४ गोल गरेका हुन्। जसम्धये २ गोल नाइजेरियाविरूद्ध गरेका थिए। अर्को एक गोल बोस्निया हर्जगोभिना र अर्को गोल इरानमाथि गरेका थिए।
यस्तै ड्रिबलमा म्यारोडोनाको कीर्तिमान तोडेका छन्। मेस्सीले यो खेलमा सात पटक बल ड्रिबल गरे, योसँगै उनी समग्रमा विश्वकपमा सबैभन्दा धेरै पटक ड्रिबल गर्ने खेलाडी बनेका छन् । उनले अहिलेसम्म विश्वकपमा १०७ पटक ड्रिबल गरेका छन् ।
उनले म्याराडोनाको ड्रिबल कीर्तिमानलाई उछिनेका हुन् । म्याराडोनाले विश्वकपमा १०५ पटक ड्रिबल गरेका थिए।
