फिफा विश्वकपमा चार पटकको विजेता, चार पटककै उपविजेता, पाँच पटकको सेमिफाइनलिस्ट र तीन पटकको क्वार्टर फाइनलिस्ट, अर्थात विश्वकपको सबैभन्दा सफल टोली डिफेन्डिङ च्याम्पियन जर्मनी नकआउट चरणमा पुग्नेबारे कुनै निश्चित छैन।
बुधबार रसिया विश्वकपमा समूह एफ अन्तर्गतका जर्मनीले नकआउट चरण प्रवेशका लागि एसियाली मुलुक दक्षिण कोरियाको साना गर्दैछ।
पहिलो खेलमा पराजयको सामना गरेको जर्मनी दोस्रो खेलमा झिनो अन्तरको जित निकाल्दै सम्भावना जिवितै राखेको छ। आज दक्षिण कोरियासँगको खेलमा फराकिलो जित हासिल गर्दै माथिल्लो चरणमा प्रवेश गर्ने लक्ष्यका साथ मैदानमा उत्रिनेछ भने दक्षिण कोरिया जर्मनीलाई रोक्दै यो प्रतियोगिता सुखद नतिजाको साथमा रुस विश्वकपलाई बिदाइ गर्ने लक्ष्यमा हुनेछ।
यो समूहमा अहिले दक्षिण कोरिया अंकविहीन छ भने स्वीडेन र जर्मनीको समान तीन अंक छ। यस्तोमा जर्मनीले बुधबारको खेलमा बराबरी खेलेको अवस्थामा मेक्सिकोले स्वीडेनलाई हराए मात्र जर्मनी माथिल्लो चरणमा पुग्न सक्छ।
उक्त दुई टोलीको खेलमा पनि बराबरीको नतिजा हासिल भए पनि गोलअन्तरको हिसाबमा स्वीडेन वा जर्मनी को माथिल्लो चरणमा पुग्ने भन्ने कुराको छिनोफानो हुनेछ।
जर्मनीले पहिलो खेलमा मेक्सिकोसँग १–० गोल अन्तरको हारको सामना गरेको भए पनि दोस्रो खेलमा भने उसले स्वीडेनलाई पराजित गरेको थियो। समूहको आफ्नो अन्तिम खेलमा बुधबार दक्षिण कोरियालाई हराउनुको उसँग कुनै विकल्प छैन। जसको कारण जर्मनी बुधबारको खेलमा आक्रामक रूपमा प्रस्तुत हुन सक्छ । दक्षिण कोरिया भने जर्मनीलाई रोक्ने मनसायमा नै मैदानमा उत्रिनेछ।
दक्षिण कोरियाले समुहका दुई खेलमा केही राम्रो प्रदर्शन गर्ने प्रयास गरेको भए पनि जित भने हासिल गर्न सकेन। दुई खेलमा हारको नतिजासँगै दक्षिण कोरिया समूहचरणबाटै बाहिरिने पक्काजस्तै भइसकेको छ। तर जर्मनीलाई अन्तिम खेलमा फराकिलो अन्तरमा हराउन सकेमा अर्को खेलमा पनि आफू अनुकुल नतिजा आए दोस्रो चरण प्रवेश गर्नेछ।
समूहचरणको खेल हेर्ने हो भने दक्षिण कोरिया जर्मनीको तुलनामा केही कमजोर देखिएको छ। तर बुधबारको खेलमा उसले जर्मनीलाई रोकेको खण्डमा त्यो उसका लागि महंगो पर्न पनि सक्छ ।
अहिलेसम्म यी दुई टोलीको बीचमा तीनपटक प्रतिस्पर्धा भएको छ, जसमा दक्षिण कोरियाले एक जित हासिल गरेको छ भने जर्मनीले दुई खेल जितेको छ । विश्वकपमा भने उनीहरुको दुईपटक भेट भएको छ र दुवैमा जर्मनीले जित हासिल गरेको थियो ।
यस्तो अवस्थामा आजको खेल रोमाञ्चक हुने देखिएको छ।
दक्षिण कोरियाविरुद्ध खेल्दा जर्मन डिफेन्डर जेरोमी बोइटेङ हुने छैनन्। स्वीडेनसँगको खेलमा रातो कार्ड पाएकाले उनले एक खेल गुमाएका हुन्। घाइते रहेका म्याट्स हुमेल्स भने फिट भएका छन् । स्वीडेनसँगको खेलमा नाक भाँचिएका सेबास्टियन रुडी पनि दक्षिण कोरियासँग खेल्ने सम्भावना कम छ।
तीन मध्ये दुई टिम कसरी पुग्नछन् अन्तिम १६ मा
जर्मनी
जर्मनीले दक्षिण कोरियासँगको खेल जितेमा वा स्वीडेनले मेक्सिकोसँगको खेलमा निकालेको भन्दा राम्रो नतिजा निकालेमा जर्मनी अघिल्लो चरण पुग्नेछ। मेक्सिकोले स्वीडेनलाई हराएमा भने जर्मनी दक्षिण कोरियासँग बराबरी गरेमा मात्रै पनि अघिल्लो चरण पुग्नेछ।
जर्मनी र स्वीडेन दुवैले बराबरी खेलेमा भने गोल अन्तरको आधारमा एक टिम अघि जाने छन् । दुवैले बराबरी गोल गरेमा भने जर्मनी हेड टु हेडका आधारमा अघि जानेछ किनकी उसले स्वीडेनलाई हराएको छ ।
कोरिया
दक्षिण कोरियाले जर्मनीलाई राम्रो अन्तरमा हराउनुपर्नेछ र स्वीडेन मेक्सिकोसँग पराजित हुनुपर्नेछ।
मेक्सिको
स्वीडेनसँगको खेलमा जित वा बराबरी गरेमा मेक्सिको अन्तिम १६ मा समूह विजेताको रुपमा जानेछ।
स्विडेन
स्वीडेनले मेक्सिकोलाई हराएमा र जर्मनीले दक्षिण कोरियासँगको खेलमा निकालेको भन्दा राम्रो नतिजा निकालेमा स्वीडेन समूह विजेता पनि बन्न सक्नेछ ।
स्वीडेनलाई अघिल्लो चरणमा जान मेक्सिकोलाई हराएर मात्र पनि पुग्दैन। यदि दक्षिण कोरियालाई जर्मनीले फराकिलो अन्तरले हराएमा स्वीडेनको बाटो बन्द हुन सक्छ।
