बेलायतबासी सर्जक कुमार केसीको सिर्जनामा गायक प्रमोद खरेलले अवाज दिएको एक मर्मस्पर्शी गीत सार्वजनिक भएको छ ।
सपनीमा देखें आमा बोलको उक्त गीत हालै युट्युवमार्फत सार्वजनिक गरिएको हो ।
बेलायतको रेडिंगमा बस्दै आएका सर्जक केसीका शब्दमा अहिलेको चर्चित रियालिटी शो भ्वाइस अफ नेपालका एक कोच समेत रहेका गायक खरेलले आवाज भरेका छन् । रमेश कायस्थको संगीत रहेको यस गीत रागा स्टुडियो काठमाडौका आशिष अविरलले अरेन्ज गरेका थिए ।
नेपालमा ललितपुरमा छायांकन गरिएको यस म्युजिक भिडियोमा विभिन्न चलचित्र तथा म्युजिक भिडियोमा सफल अभिनय गरिसकेका कलाकारहरु जीवन भट्टराई र रश्मी भट्ट लगायतका कलाकारहरुले अभिनय गरेका छन । यस भिडियोको निर्देशन कान्तिपुर टेलिभिजनका कार्यक्रम निर्माता अर्जुन अधिकारीले गरेका हुन् भने यसको निर्माण कुमार केसीले गरेका हुन्।
गीतमा परदेशमा रोजगारीमा रहेको छोराले नेपालमा रहेकी मुटुको रोगी आमालाई सम्झेर भावविभोर भएको कथा समेटिएको छ । त्यसै गरी दशैंमा घरमा जान नपाउदाको पिंडा, भाइटीकामा दिदीको सम्झनाले भक्कानिएको मुटु अनि साहुको ऋणले पिरलिएको आमाको मर्म गीतमा पोखिएका छन्।
त्यसै गरी नेपालमा आमाले परदेशी छोरालाई सम्झेर बिताइरहेको कठिन पलहरु समेत गीतमा अटाएका छन् । नेपाली ग्रामीण जीवनको यथार्थता तथा साँचो अर्थमा लाखौ प्रवासी छोराहरुको प्रतिनिधित्व गरेको गीतलाई दर्शकहरुले रुचाएका छन् ।
-1746009348.jpg)
