ललितपुरमा ठूला यातायातको सेवा विस्तार गर्ने रणनीतिअनुरुप ललितपुर महानगरले पनि साझा बसमा १ करोड रुपैयाँ लगानी गर्ने भएको छ।
ललितपुर महानगर र साझा यातायातबीच १ करोड रुपैयाँका थप बसहरु ल्याई संचालन गर्नेगरी सम्झौता भएको छ। साझाले महानगरलाई एक करोड रुपैयाँको सेयर प्रदान गर्नेछ र बस साझाले संचालन गर्नेछ।
काठमाडौं महानगरको साझामा १५ करोड रुपैयाँको सेयर लगानी छ। पछिल्लो पटक सो महानगरबाट साझालाई प्रदान भएको ५ करोड रुपैयाँबाट भने उपत्यकालाई विभिन्न जिल्लाहरुसँग जोड्नेगरी डिलक्स बस ल्याउने साझाको तयारी छ।
ललितपुर महानगरका मेयर चिरिबाबु महर्जनले थप साझा बसहरु ल्याएर बुङमती र गोदाबरीसम्म संचालन गरिने जानकारी दिए। ‘साझासँग थप बसहरु ल्याएर बुङमति तथा गोदावीसम्म संचालन गर्ने सहमति भएको छ’ उनले भने ‘ललितपुरमा ठूला बसहरु संचालन गरी यातायातलाई व्यवस्थित गर्ने हाम्रो योजना छ।’
सम्झौता भइसकेकाले अबको एक महिनाभित्र महानगरलाई साझालाई सो रकम हस्तान्तरण गर्नेछ। साझालाई रकम हस्तान्तरण भइसकेपछि प्रक्रिया सुरु हुने साझाका कामु कार्यकारी अधिकृत महेन्द्रराज पाण्डेले जानकारी दिए। ‘रकम प्राप्त भइसकेपछि बल्ल प्रक्रिया सुरु हुन्छ, सम्झौताअनुरुप अबको एक महिनाभित्र महानगरले साझालाई एक करोड रुपैयाँ दिनेछ’ पाण्डेले भने।
अहिलेकै बसहरुको हिसाव गर्दा सो रकमबाट तीन वटा बसहरु थपिनेछ। ‘अहिलेका साझा बसको लागतअनुसार त्यो रकमबाट तीन वटा बसहरु ल्याउन सकिन्छ, तर प्रक्रिया तथा विविध कारणले लागत बढ्न पनि सक्छ’ साझाका कामु कार्यकारी अधिकृत पाण्डेले भने।
साझाले हाल ललितपुरको लगनखेलबाट जाउलाखेल, कुपण्डोल हुँदै काठमाडौं महानगरको थापाथली, त्रिपुरेश्वर, शहीदगेट, लैनचौर, नारायणगोपाल चोक, गंगबु बसपार्कसम्म केही बसहरु संचालन गरिरहेको छ। अहिले संचालन भइरहेका बसले ललितपुरका धेरै ठाउँहरु समेट्न नसकिएको महानगरले जनाएको छ।