दोक्लमबाट फौज फिर्ता गर्न भारतलाई चीनको चेतावनी

बिबिसी

साउन १

चीनको सरकारी समाचार संस्थाले आफ्नो भूभागमा गैरकानूनी रुपमा भारतीय सेना बसिरहेको भन्दै उनीहरुलाई त्यहाँबाट नहटाइए भारतले लाजमर्दो अवस्था सामना गर्नुपर्ने चेतावनी दिएको छ।

सिन्ह्वा समाचार संस्थाले प्रकाशन गरेको एक टिप्पणीमा उल्लेख भएअनुसार चीन, भारत र भुटानको सीमा क्षेत्र नजिकै पर्ने दोक्लमबाट भारतीय फौज फिर्ता नहुन्जेलसम्म कुनै किसिमको वार्ता हुन सक्दैन।

भारतले उक्त भूभागमाथि भुटानले दाबी गरिरहेको भन्दै चिनियाँ पक्षलाई त्यस क्षेत्रमा नयाँ सडक निर्माण गर्न नदिन आफूले अघिल्लो महिना सैनिकहरु पठाएको बताउँदै आएको छ।

नयाँ दिल्लीको चिन्ता भनेको उक्त सडकका कारण आफ्नो सुरक्षामा गम्भीर चुनौति थपिने भन्ने हो।

विवादः

सिन्ह्वामा प्रकाशित उक्त लेखका अनुसार चीनले दोक्लम क्षेत्रबाट आफ्ना फौज फिर्ता लैजान पटक पटक गरेको आग्रह भारतले अस्वीकार गरिरहेको छ। साथै एक महिनादेखि चलिरहेको उक्त विवाद समाधान गर्न भारतले वेवास्ता गरिरहे उसले थप लाजमर्दो अवस्था सामाना गर्नुपर्ने चेतावनी चीनले दिएको छ।

उक्त लेखमा पहिलो पटक सिक्किमसँग सीमा जोडिएको आफ्नो भूमीमा भारतीय फौज प्रवेश गरेको भन्दै अहिलेको अवस्थालाई पाकिस्तान, भारत र चीन तीनै देशको दाबी रहेको दक्षिणपूर्वी कश्मिरमा सन् २०१३ र सन् २०१४ मा भएका भिडन्त जसरी साधारण रुपमा नलिन भनिएको छ।

यस बिषयमा भारतसँग कुनै वार्ता नगर्ने भन्दै भारतले दोक्लम आएका फौज फिर्ता गर्नुपर्ने अडान चीनले राख्दै आएको छ।

यसैबीच भारतीय अखबार द इन्डियन एक्सप्रेसका अनुसार भारतको केन्द्र सरकारले दोक्लम विवादबारे त्यहाँका विपक्षी दलहरुसँग छलफल गरेको जनाएको छ।

विपक्षी नेताहरुले सरकारलाई बेइजिंगसँगको तनाव कम गर्न र कूटनीतिक तहबाट समस्या समाधान गर्न सुझाव दिएको बताइएको छ।

उक्त बैठकमा गृहमन्त्री राजनाथ सिंह, विदेशमन्त्री सुस्मा स्वराज, अर्थमन्त्री अरुण जेट्लीसहित उच्च भारतीय अधिकारीहरु सहभागी थिए।

भारत र चीनबीच ४ हजार किलोमिटरभन्दा लामो जमिन जोडिएको सीमा क्षेत्र छ।

सीमा विवादका कारण उनीहरुबीच सन् १९६२ मा युद्ध समेत भएको थियो।

(बिबिसीबाट साभार)

प्रकाशित मिति: आइतबार, साउन १, २०७४ ०८:०६

सिफारिस