कैलाली निर्वाचन क्षेत्र नम्बर ५ क्षेत्रीय कार्य समितिले पूर्वसांसद पुष्करनाथ ओझासहित २० जनालाई कारवाहीको माग गर्दै नाम सिफारिस गरेको छ।
नेपाली कांग्रेस पार्टीका तर्फबाट आधिकारिक उम्मेदवार विरुद्ध कू–प्रचार गरी पार्टी तथा पार्टीका उम्मेदवारहरूलाई हराउन लागि परेको भन्दै कारवाहीका लागि केन्द्रीय समितिमा नाम सिफारिस गरेको हो।
क्षेत्र नम्बर ५ का सभापति हरिश खडका, सचिव भीम पडाल, धनगढी नगर सभापति नृपबहादुर वड, सचिव यज्ञराज उपाध्याय, निर्वाचन परिचालन मुल समितिका वडा संयोजकहरूले पेश गरेको प्रतिवेदनमा मन्त्री ओझासहित महासमिति सदस्य, जिल्ला पार्टी सचिव, वडा सदस्य, साधारण सदस्यहरू गरी २० जनाको नाम सिफारिस गरेको क्षेत्रीय कार्य समितिले जनाएको छ।
समितिले पार्टी महासमिति सदस्य आनन्द राज जोशी, पार्टी जिल्ला सचिव पुर्ण कुँवर, धनगढी वडा नम्बर ५ का वडा सदस्य बब्लुकुमार चौधरी, जिल्ला सदस्य लक्ष्मी देवकोटा, निर्वाचन क्षेत्र नम्बर ५ का क्षेत्रीय उपसभापति कुम्भराज गिरीको नाम सिफारिस गरेको छ।
यस्तै, नेपाल विद्यार्थी संघ सह–महामन्त्री प्रेम जोशी, धनगढी वडा नम्बर ७ का सभापति देवबहादुर सेठी, वडा नम्बर १९ का वडा सचिव गंगादत्त ओझा, वडा नम्बर ३ का क्षेत्रीय प्रतिनिधी सीताराम अवस्थी, वडा नम्बरका वडा सदस्य शुभाष चन्द, वडा नम्बर १८ का क्षेत्रीय प्रतिनिधि फूलनारायण भुषाल, वडा नम्बर १३ का तरुण दल अध्यक्ष खडक ओझा, वडा नम्बर १३ का क्षेत्रीय प्रतिनिधि भोजराज भट्ट रहेका छन् ।
यस्तै, क्रियाशील सदस्य विनायक पनेरु, लोकराज अवस्थी, चन्द्रदेव जोशी, शिक्षक संघ जिल्ला कार्य समिति सदस्य लक्ष्मी ओझा, पूर्व क्षेत्रीय सचिव खेम भट्ट र सदस्य भूमिनन्द ओझाको नाम सिफारिस गरिएको क्षेत्रीय सभापति हरिश खडकाले जानकारी दिए ।
निर्वाचनका क्रममा कार्यकर्ता परिचालन, आर्थिक व्यवस्थापन, विभिन्न समुदायहरुसंगको छलफल, अन्तर्क्रियालाई गर्दा समेत आरजु राणा देउवाले यस क्षेत्रबाट हार्नु आफैंमा अप्रत्यासित घटना रहेको बताएका छन् ।
शुक्रबार मात्र नेपाली कांग्रेसका सभापति शेरबहादुर देउवाले पार्टीलाई पुरानै बलियो अवस्थामा फर्काएर मात्र विश्राम लिने बताएका थिए। सभापति देउवाले नेपाली कांग्रेसलाई ‘अन्तर्घातीमुक्त’ बनाउने पनि घोषणा दोहोर्याएका थिए ।
‘पार्टीलाई अन्तर्घातीविहीन बनाएरै छोड्छु पार्टीको निर्देशन नमान्ने र अनुशासनको पालना नगर्नेहरूमाथि कारवाही गर्छु’ देउवाले भनेका थिए।
