सार्वजनिक बिदाका समय सरकारी निकायका सवारी साधन गुडेमा कारवाही हुने भएको छ। प्रदेश प्रहरी कार्यालयले सुरक्षा तथा सार्वजनिक सम्पत्ति दुरूपयोग गर्नेका निम्ति यस्तो नियम अनिवार्य गराएको हो।
फागुनको पहिलो सातादेखि लागू हुने गरी मुस्ताङमा पनि यस्तो नियम लागू भएको जिल्ला ट्राफिक कार्यालय मुस्ताङका ट्राफिक असई बिष्णुपल्ली मगरले जानकारी दिए।
उनका अनुसार सार्वजनिक बिदाका दिन सरकारी सवारी साधन चलाउन परेको खण्डमा जिल्ला प्रशासन कार्यालयको अनुमति पत्र अनिवार्य गराईएको हो। ‘सुरक्षाका दृष्टीले सरकारले यस्तो अवधारणा बनाएको हो,’ उनले भने, ‘बिना अनुमति आफू खुसी सरकारी गाडी चलाएको पाईएमा अबिलम्ब नियमन्त्रणमा लिई कारवाही गछौं।’
यता, सार्वजनिक बिदा तथा कार्यालयको काम बेगर मनोमानी रूपमा सरकारी नम्बर प्लेटका गाडीहरु अन्धाधुन्द प्रयोग गर्दै दुरूपयोग भएको स्थानीयस्तरमा जनगुनासो बढ्दै गईरहेको बेला सरकारले यस्तो नियम लागू गरेकोमा स्थानीय सरोकारवालाले स्वागत गरेका छन्।
ट्राफिक असई पल्लीमगरका अनुसार सार्वजनिक बिदामा सुरक्षासँग जोडिएको प्रहरी, सेना र प्रशासनका सवारी साधनको हकमा पास अनिवार्य नभएको खुलाए।
मुस्ताङका ५ वटै स्थानीय निकायका जनप्रतिनिधि तथा कर्मचारीका निम्ति सरकारी गाडीको बन्दोबस्त छ। यस्ता गाडी सही काममा प्रयोग भए नभएको अनुगमन समेत हुन जरूरि रहेको स्थानीयको भनाई छ। ‘अफिसियल काममा सरकारी गाडी प्रयोग गर्न पाउनु अधिकारको कुरा हो,’ एक सरोकारवालाले भने, ‘तर, सरकारी कामको बाहनामा व्यक्तिगत मनोमानी गर्न पाईदैन।’
यस्तै, मुक्तिनाथ दर्शन तथा अन्य प्रयोजनमा मुस्ताङ घुम्न आउने जिल्ला बाहिरका सरकारी निकायका सवारी साधनलाई समेत सम्वन्धित प्रशासनका अनुमतिपत्र पास अनिवार्य हुनुपर्ने ट्राफिक कार्यालय मुस्ताङले जनाएको छ।
कार्यालयले मनोमानी भ्रमणका नाममा रित नपुर्याई सरकारी गाडी प्रबेश गरेको पाईए कारवाही गर्ने जनाएको छ ।
जिल्ला ट्राफिक कार्यालय मुस्ताङले सूचनाको अटेर गरी आफूखुसी सवारी चलाएको पाइएमा कारबाही गरिने जनाएको छ। गत साता मात्रै जिल्ला ट्राफिक कार्यालयले सार्वजिक बिदाका दिन गाडी चलाएको भन्दै जिससको गाडीलाई ३ घण्टा नियन्त्रणमा लिई साधेपुछ गरी आईन्दा नचलाउने शर्तमा छाडिएको थियो।
यस्तै मुस्ताङकै एक स्थानीय तहको नाममा रहेको ग १ ब २२४ नम्बरको सरकारी मोटर साईकललाई कारवाही गरेको ट्राफिक कार्यालयले बताएको छ।