नेकपाभित्र विवाद बढ्दै जादा प्रधानमन्त्री एवम् नेकपा अध्यक्ष केपी ओली र अर्का अध्यक्ष पुष्पकमल दाहाल 'प्रचण्ड'बीच संवादहिनता बढेको छ।
गत कात्तिक २५ गते दुई अध्यक्षबीच भेटघाट भएको थियो। त्यसयता दुइटा सचिवालय बैठक बसेका छन्। तर उनीहरूबीच 'वान टु वान' कुराकानी भएको छैन।
यसअघि अधिकांश सचिवालय बैठक बस्नु पहिलेसमेत दुई अध्यक्षबीच भेटघाट हुन्थ्यो। कात्तिक २८ को बैठकमा एकतर्फी रूपमा प्रतिवेदन पेश गरेको भन्दै प्रधानमन्त्री ओली र उनी पक्षधर नेताहरू प्रचण्डसँग आक्रोशित छन्। उनीहरूले प्रचण्डले राखेको प्रस्तावलाई आरोप-पत्रको संज्ञा समेत दिएका छन्।
मंसिर ३ को बैठकमा ओलीले दस दिन समय मागेका थिए। अब बैठक १३ गते बस्दैछ। उक्त बैठकमा ओलीले प्रचण्डको आरोपको जवाफ दिने तयारी गरेका छन्।
ओलीनिकट स्रोतले उनी पार्टी एकताभन्दा पहिलाको अवस्थामा पुगेको भन्दै त्यसको समीक्षा गर्नुपर्ने पक्षमा पुगेको बताएको छ।
'अब नेकपा शून्यको अवस्थामा पुगेको छ। पार्टी एकता हुनुपहिले नेकपा एमाले र माओवादी केन्द्रको स्थिति बनेको छ,' प्रधानमन्त्रीनिकट स्रोतले सेतोपाटीसँग भन्यो, 'अब पार्टी एकता र कार्यकारी अध्यक्षबारे समेत समीक्षा गर्नुपर्ने लगायत विषयमा प्रधानमन्त्रीको प्रस्ताव आउन सक्छ।'
ओली र प्रचण्डबीच संवादहिनता भएका बेला समेत ओलीनिकट नेताहरूले प्रचण्डलाई भेट्ने गरेका थिए। यसपटक भने प्रचण्डले ओली पक्षधर नेताहरूलाई एक दिन मात्रै धुम्बाराहीमा भेटेका छन्।
'शुक्रबार अध्यक्षले महासचिव विष्णु पौडेल र संसदीय दलका उपनेता सुवास नेम्वाङलाई छुट्टाछुट्टै भेट गर्नुभएको हो। धुम्बाराहीमा भएको त्यो भेटबाहेक ओली पक्षीय नेतासँग भेट भएको छैन,' प्रचण्डनिकट एक नेताले भने, 'उहाँहरू प्रस्ताव फिर्ता होस् भन्ने चाहनुहुन्छ। प्रचण्डले फिर्ता लिने सम्भावनै छैन। उहाँ त प्रधानमन्त्रीको प्रस्ताव कस्तो आउँछ भनेर पर्खिरहनु भएको छ।'
स्रोतअनुसार शुक्रबार महासचिव पौडेलले प्रचण्डसँग प्रस्ताव फिर्ता लिन आग्रह गरेका थिए। पौडेलले प्रस्ताव फिर्ता लिएर साझा प्रस्ताव बनाउन गरेको आग्रह प्रचण्डले अस्वीकार गरेका थिए।
मध्यमार्गी भूमिका खेलिरहेका पूर्व माओवादी पक्षधर नेतासँग पनि आफूले प्रस्ताव फिर्ता नलिने प्रचण्डले स्पष्ट पारेका छन्। आफूलाई भेट्न खुमलटार पुगेका स्थायी कमिटी सदस्यद्वय टोपबहादुर रायमाझी र हरिबोल गजुरेलसँग प्रचण्डले 'प्रधानमन्त्रीले ल्याउने प्रस्तावले पार्टीमा छलफलको वातावरण विकास गर्ने' बताएका थिए।
भेटमा प्रचण्डले आफू पार्टी एकताकै पक्षमा रहेको बताएको गजुरेलले सेतोपाटीलाई बताए।
'हामीले प्रचण्डलाई तपाईंले पार्टी एकता गतिशील बनाउनु पर्यो भनेका थियौं। उहाँले म एकताकै पक्षमा हो तर मैले मात्रै हल गरेर हुने कुरा भएन। तपाईंहरूले पनि समस्या कहाँ छ भनेर बुझ्न पर्यो भन्नुभयो,' गजुरेलले भने, 'प्रधानमन्त्रीले पनि प्रस्ताव तयार गर्नु हुन्छ। त्यसमा व्यवस्थित तरिकाले छलफल गर्यो भने नराम्रो हुँदैन।त्यो बहसले हामीलाई रूपान्तरणमा एकअर्कालाई मद्दत गर्छ भनेर प्रचण्डले भन्नु भएको छ।'
अन्तरविरोध समाधानको खोजीमा आफूहरू लागिरहे पनि सकारात्मक भइनसकेको उनले बताए। गजुरेलका अनुसार प्रचण्डले आफ्ना कारणले समस्या पैदा नभएको भन्दै प्रधानमन्त्री सच्चिन जरुरी रहेको बताएका थिए।
'स्थायी कमिटीको निर्णय कार्यान्वयनमा उहाँले तत्परता देखाउनुभएन, प्रधानमन्त्री सच्चिन जरुरी छ भन्ने प्रचण्डको धारणा छ,' गजुरेलले भने, 'उता प्रधानमन्त्री पनि मैले काम गर्ने वातावरण रहेन, घेराबन्दी भयो, बाहिर मिटिङ बसेर मकहाँ आउनुहुन्छ, मलाई सहज रूपले काम गर्ने वातावरण भएन भन्नुहुन्छ। दुवैले एकअर्कालाई दोष दिनुभएको छ। तर समाधानको उपाय पत्ता लागेको छैन।'