विभाजन आएसँगै नेकपा सांसदले तिर्दै आएको लेबी रकम काटिन छोडेको छ।
यसअघि संघीय संसद सचिवालयले नेकपाका सांसदहरूले पाउने रकममा लेवी कटाएर मात्रै उनीहरूको बैंक खातामा रकम पठाउने गरेको थियो।
नेकपा एउटै पार्टी भए पनि पूर्व माओवादी सांसद र पूर्व एमाले सांसदले तिर्ने लेभी फरक-फरक थियो। उनीहरूको रकम पूर्व पार्टीकै खातामा जान्थ्यो। दुवै पार्टीको संसदीय दलको कार्यालयसमेत फरक-फरक थियो।
संसद सचिवालयका प्रवक्ता रोजनाथ पाण्डेले नेकपाका राष्ट्रिय सभाका सांसदहरूको पुस महिनाको पारिश्रमिक लेभी नकटाइ उनीहरूकै बैंक खातामा पठाइएको सेतोपाटीलाई जानकारी दिए।
पार्टीमा विभाजन आएसँगै केही सांसदहरुले आफ्नो लेबी नकटाउन संसद सचिवालयमा निवेदनसमेत दिएका थिए। राजनीतिक रुपमा नेकपा विभाजन भए पनि कानुनी रुपमा भने अझै विभाजन भएको छैन।
तात्कालीन नेकपा एमालेले सांसदसँग १३ हजार र माओवादी (केन्द्र) ले १२ हजार लेभी अशुल गर्ने गरेको थियो।
सांसदहरूले दल एकीकृत भएपछि लेभीमा एकरूपता ल्याउनुपर्ने माग गरेपछि १२ हजार रुपैयाँ कायम भएको थियो।
राष्ट्रिय सभामा नेकपाका ४७, नेपाली कांग्रेसका ६ जना, जसपाका तीन जना र मनोनित ३ जना सांसद सदस्य छन्।
प्रधानमन्त्री केपी शर्मा ओलीको सिफारिसमा पुस ५ गते राष्ट्रपति विद्यादेवी भण्डारीले प्रतिनिधिसभा विघटन गरेसँगै त्यस दिनदेखि नै प्रतिनिधिसभाका सदस्यहरुको सबै प्रकारका सेवा सुविधा रोकिएका छन्।