बिहीबार प्रधानमन्त्री केपी शर्मा ओली आफ्नो गुटनिकट प्रेस संगठनको राष्ट्रिय भेलामा प्रमुख अतिथिको रुपमा बोल्दैथिए।
सम्बोधन गर्ने क्रममा उनले महिलाको किड्नी लगाएकोले ‘आफ्नो दिमाग खुस्किएको’ भन्ने गलत समाचारको प्रसंग पुन: उठाए।
राष्ट्रिय सभागृहमा आयोजित प्रेस संगठन नेपालको दोस्रो राष्ट्रिय भेलामा नेकपा प्रचण्ड-नेपाल समूहका नेता भीम रावललाई लक्षित गर्दै उनले यो प्रसंग उठाएका थिए।
उनले रावलको नाम नलिइकन ‘महिलाहरूको अपमान गरिएको’ बताएका थिए।
‘एउटा भर्खर भर्खर डा. लेख्न थालेकाले अस्ति भाषण गरे, केपी ओलीले महिलाको किड्नी राखेको त्यसकारण दिमाग खुस्कियो भनेर। महिलामाथि कत्रो अपमान! लेख्या छन् डा.। के मा लेख्याछन् थाहा छैन,’ उनले भने, ‘के विषयको डा. हो थाहा छैन। डा. लेख्या छ तर केपी ओलीको दिमागले काम गर्दैन रे! किनभने किड्नी चाँहि महिलाको राख्या छ रे।’
रावलले आफूले भन्दै नभनेको कुरा प्रचारमा ल्याइएको भन्दै यसअघि सार्वजनिक रुपमै उक्त प्रसंगको खण्डन गरेका थिए।
रावलको सन्दर्भ निकालेर प्रधानमन्त्री ओलीले पत्रकारहरूको पनि ‘बुद्धि कोल्टे नपरोस्’ भनेका छन्।
‘तपाईंहरूको बुद्धि कोल्टे त्यस्तो नपरोस्। तपाईंहरूको बुद्धि ठिक बाटोमा जाओस्। तपाईंहरूले सामाजिक न्याय र समानताको पक्षमा कुरा गर्नु पर्दछ,’ ओलीले भने।
यसअघि पनि प्रधानमन्त्री केपीशर्मा ओलीले गलत समाधारलाई आधार मान्दै गत पुस १९ गते भाषण गरेका थिए।
केही समयअघि रावलले ‘ओलीको शरीरमा स्त्रीको अङ्ग मिसिएकोले दिमागले काम गरेन’ भन्ने भाषण गरेको भन्दै एउटा अनलाइनमा समाचार आएको थियो। तर, तथ्य जाँचबाट उक्त समाचार ‘फेक’ भएको खुलेको थियो।
रावलले पनि ट्वीट गर्दै त्यसलाई ‘कुप्रचार’ भनेका थिए।
रावलले आधारहीन प्रायोजित र आफूप्रति घृणा फैलाउन प्रेषित सामग्रीमा टिप्पणी गरेबाट प्रधानमन्त्री ओलीले आफूलाई ‘फितलो, भ्रम र झुटको सहारा लिने व्यक्तिका रूपमा पुष्टि गरेको’ पनि बताएका थिए।
तैपनि, ओलीले रावललाई मनसाययुक्त ढुंगले उक्त आरोप लगाइरहेका छन्। रावल प्रधानमन्त्री ओलीप्रति खरो आलोचना गर्ने व्यक्ति हुन्।
