प्रधानमन्त्री केपी शर्मा ओलीले प्रचण्ड–नेपाल समूहलाई स्वार्थबाट लपेटिएका मान्छेहरू भनी टिप्पणी गरेका छन्। पुष्पकमल दाहाल प्रचण्ड र माधवकुमार नेपाल जस्ता मान्छेहरूलाई सानोसानो विषयले ठूलै असर गर्ने भएकाले हिजो चितवनमा ‘मुह मिठा’ गरेका टिप्पणी पनि उनले गरे।
सर्वोच्चको फैसलापछि बुधबार दिउँसो पहिलोपटक सार्वजनिक कार्यक्रममा सहभागी भएका प्रधानमन्त्री ओलीले सर्वोच्चको फैसलालाई आफूले सामान्य रुपमा लिएको बताए।
उनले भने, ‘मैले प्रधानमन्त्रीमा रहुन्जेल राम्रो काम गर्छु। हिजोको अदालतको फैसलाले बरबाद पारेको होइन। यो सामान्य कुरा हो। मेरा केही भाइहरूले लड्डु खुवाईखुवाई गरे रे, लड्डु खाएछन्। खुसी भएर, जित्यौं भनेर। के जिते मलाई थाहा छैन। के पाउँछन् अब हेर्नुछ।’
प्रधानमन्त्री ओलीले जित भयो भनेर लड्डु खानेहरूले भोलिपर्सिदेखि राजीनामा माग्ने समेत बताए। तर आफूलाई त्यतातर्फ कुनै चिन्ता नभएको बताए।
उनले भने, ‘मेरो विचारमा भोलिपर्सिदेखि फेरि राजीनामा माग्नुहुन्छ कि जस्तो लाग्छ। राजीनामा देऊ, राजीनामा देऊ’ भनेर। तर यतापट्टी चिन्ता गर्नुपर्दैन। को मान्छे कतिखेर हर्ट-अट्याक भएर मर्नसक्छ, ब्रेन ह्यामरेज भएर मर्नसक्छ, गाडी ठोक्किएर मर्नसक्छ, जलेर मर्नसक्छ, जीन्दगीको कुनै ठेगान छैन। जबसम्म बाँचिन्छ तबसम्म राम्रो काम गर्ने हो । मरेपछि न मान्छे बेइमान हुनसक्छ न इमानदार हुनसक्छ।’
प्रधानमन्त्री ओलीले आफूले राम्रो काम गरेको दाबी समेत गरे। उनले जस्तोसुकै परिस्थितिमा पनि आफूहरू दृढताका साथ समृद्धिको यात्रामा अघि बढिरहने बताए।
आफूले सरकारको नेतृत्व गरेको तीन वर्षमा पूर्वाधार र आर्थिक विकासका क्षेत्रमा महत्वपूर्ण उपलब्धि हासिल भएको बताउँदै उनले कतिपय व्यक्ति सुरुङ र पानीजहाजका कुरा गर्दा पहिले हाँसे पनि अहिले नेपालमा कतै सुरुङ बन्न सुरू भइसकेको र कतै प्रक्रियामा रहेको जनाए।
उनले पूर्व–पश्चिम जोड्ने चार वटा राजमार्ग तीव्रताका साथ निर्माण भइरहेको जानकारी दिए।
‘हामीले पूर्वपश्चिम नै जोड्ने रेलमार्ग निर्माण अघि बढाइरहेका छौं,’ उनले भने।
आगामी आर्थिक वर्षमा दोहोरो अंकको आर्थिक वृद्धिदर हासिल गर्ने लक्ष्यका साथ सरकार अघि बढिरहेको प्रधानमन्त्री ओलीले बताए। सन् २०३० सम्ममा दिगो विकास लक्ष्य हासिल गर्ने र सन् २०२२ सम्ममा देशलाई विकासोन्मुख मुलुकमा रुपान्तरण गर्ने लक्ष्य लिइएको पनि उनले उल्लेख गरे।