नेपाली कांग्रेसको महाधिवेशन प्रतिनिधिका लागि हिजोआज अधिवेशन भइरहेका छन्।
मंसिर ६ मा महाधिवेशन प्रतिनिधिको लागि चुनाव भएका थिए। एकमात्र संघीय निर्वाचन क्षेत्र भएका अधिकांश जिल्लामा मंसिर ६ मै जिल्ला अधिवेशन भएको थियो।
एकभन्दा बढी संघीय निर्वाचन भएका काठमाडौंलगायत जिल्लामा भने शुक्रबार जिल्ला अधिवेशन हुँदैछ। जिल्ला सभापति उठ्न एकभन्दा बढी संघीय निर्वाचन क्षेत्र भएका जिल्लामा अनिवार्य महाधिवेशन प्रतिनिधि चयन भएको व्यक्ति हुनुपर्ने विधानको व्यवस्था छ।
कांग्रेसले मंसिर ६ मा १४८ संघीय निर्वाचन क्षेत्रमा अधिवेशन सुरू गरेको थियो। सर्लाहीलगायत केही जिल्लामा अधिवेशन हुन बाँकी नै छ।
यसपालि अधिवेशनबाट युवाहरू पनि महाधिवेशन प्रतिनिधिमा आएका छन्। नेविसंघलगायत भातृ संस्थामा क्रियाशील युवाहरू कांग्रेस महाधिवेशन प्रतिनिधि बनेका छन्।
यीमध्ये केही नेताका छोराछोरी वा आफन्त भएकै आधारमा महाधिवेशन प्रतिनिधि पनि चयन भएका छन्। विरासतको राजनीतिले नयाँ पुस्तालाई फाइदा पुगेको छ।
कांग्रेसमा संस्थापकहरूमध्येका बिपी कोइराला, गणेशमान सिंह, महेन्द्रनारायण निधिलगायतका छोराछोरी पनि राजनीतिमा सक्रिय थिए।
एकै घरका मातृका, बिपी र गिरिजाप्रसाद कोइराला कांग्रेसमा सभापति र प्रधानमन्त्री पनि भएको इतिहास छ।
गणेशमानका छोरा प्रकाशमान कांग्रेस नेता छन्। यसपालि सभापति उठ्ने उनको तयारी छ।
महेन्द्रनारायणका छोरा विमलेन्द्र कांग्रेस उपसभापति छन् उनी पनि यसपालि पार्टी महाधिवेशनमा सभापति उठ्ने तयारीमा छन्।
बिपीका छोरा शशांक कांग्रेस महामन्त्री छन्। उनी पनि सभापतिका आकांक्षी छन्। कोइराला परिवारकै शेखर कोइराला र सुजाता कोइराला केन्द्रीय सदस्य छन्। उनीहरू पनि सभापति पदकै आकांक्षी छन्।
सकेसम्म आफू, नभए श्रीमती र छोराछोरी, त्यसपछि आफन्तलाई राजनीतिमा अगाडि बढाएको आरोप नेताहरूमाथि लाग्छ। पछिल्लो समय कांग्रेसमा भइरहेका अधिवेशनमा पनि नेताका श्रीमतीदेखि छोराछोरीसम्मले अवसर पाएका छन्।
पार्टीमा जेलनेल खाएको, गाउँमा दु:ख गरेको, माओवादी सशस्त्र युद्धमा समेत दु:ख पाएकाहरूलाई पार्टीले उपयुक्त भूमिका दिन नसकेको आरोप लागिरहेका बेला नेताका आफन्त भने खुरूखुरू पार्टीका महत्वपूर्ण पदमा पुगेका छन्।
सभापति शेरबहादुर देउवाकी पत्नी, कांग्रेस नेता आरजु राणा देउवा डडेल्धुराबाट यसपालि सर्वसम्मत रूपमा महाधिवेशन प्रतिनिधिमा चयन भएकी छन्।
यसैपालि डडेल्धुराबाट कांग्रेस क्रियाशील सदस्यता लिएका देउवाका छोरा जयवीरसिंह भने क्षेत्रीय प्रतिनिधि हुँदै महाधिवेशन प्रतिनिधि आएनन्, क्रियाशीलमै रोकिएका छन्।
डडेल्धुरामा यसअघिका सभापति कर्णबहादुर मल्ल पक्षले अधिवेशनमा भाग लिएको थिएन। देउवा पक्षले एकलौटी अधिवेशन गरे पनि जयवीर महाधिवेशन प्रतिनिधि आएनन्। उनले तत्काल पार्टी राजनीतिमा सक्रियता नदेखाउने उनीनिकट स्रोत बताउँछ।
प्रकाशमानका जेठा छोरा, तरूण दलका पार्षद प्रभाषमान सिंह भने काठमाडौं क्षेत्र नम्बर ७ बाट सर्वसम्मत रूपमा महाधिवेशन प्रतिनिधि भएका छन्।
कांग्रेस नेतासमेत रहेकी प्रकाशमानकी श्रीमती सिर्जना पनि सोही क्षेत्रबाट यसपालि महाधिवेशन प्रतिनिधि सर्वसम्मत चयन भइन्। उनी यसअघि ११ औं अधिवेशनमा पनि महाधिवेशन प्रतिनिधि थिइन्।
सिर्जना विगतमा महिला संघमासमेत क्रियाशील रहेर राजनीतिमा सक्रिय थिइन्। उनी नेविसंघदेखिकै राजनीतिमा क्रियाशील थिइन् तर पछिल्लो समय उनी पार्टीमा सक्रिय थिइनन्।
यसपालि प्रकाशमान सभापति उठ्ने तयारी गरिरहेका बेला सिर्जना र प्रभाषमान नै महाधिवेशन प्रतिनिधि आएका छन्। प्रकाशमान स्वत: महाधिवेशन प्रतिनिधि हुने भएकोले उनको घरमै तीन भोट छ।
सिंहनिकट कांग्रेसका नेता नवीन्द्रराज जोशीको मस्तिष्कघातपछि उपचारका क्रममा २०७७ चैतमा निधन भएको थियो। पूर्वमन्त्रीसमेत रहेका जोशी कांग्रेसमा निष्ठावान् नेताका रूपमा चिनिन्थे।
जोशीको परिवार पनि राजनीतिमा सक्रिय छ। काठमाडौं क्षेत्र नम्बर ८ बाट यसपालि उनकी श्रीमती सपना महाधिवेशन प्रतिनिधि जितेकी छन्, सबैभन्दा धेरै मतसहित।
जोशीकै परिवारका राजुराज जोशी पनि महाधिवेशन प्रतिनिधि जिते। काठमाडौं महानगरमा उनी विद्यासुन्दर शाक्यसँग मेयरमा २०७४ सालमा पराजित भएका थिए। राजुराजकी श्रीमती शोभा पनि कांग्रेस महाधिवेशन प्रतिनिधि छिन्।
वरिष्ठ नेता रामचन्द्र पौडेलकी छोरी पनि महाधिवेशन प्रतिनिधि भएकी छन्। कास्की क्षेत्र नम्बर १ बाट उनले धेरै मतसहित महाधिवेशन प्रतिनिधि खुलातर्फ जितेकी थिइन्। उनको परिवार पनि कांग्रेस राजनीतिमा सक्रिय छ।
वरिष्ठ नेता पौडेल यसपालि सभापतिका आकांक्षी छन्।
पूर्वगृहमन्त्रीसमेत रहेका खुमबहादुर खड्काको निधन भएपछि उनकी श्रीमती र छोरा राजनीतिमा सक्रिय छन्।
खुमबहादुरका छोरा २८ वर्षका अनुराज खड्का यसपालि कांग्रेस महाधिवेशन प्रतिनिधि भए, दाङ क्षेत्र नम्बर १ बाट लोकप्रियमतसहित। उनी राजनीतिमा अब सक्रिय रूपमा देखिने भएका छन्।
कांग्रेसका उपसभापति विजयकुमार गच्छदार सभापति देउवानिकट छन्। उनी देउवाको समूहबाट यसपालि पनि उपसभापति पदमा उम्मेदवारी दिने तयारीमा छन्।
उनले आफ्ना छोरा सुवास गच्छदारलाई राजनीतिमा सक्रिय बनाउन लागेका छन्। सुवास सुनसरी क्षेत्र नम्बर ६ बाट कांग्रेस महाधिवेशन प्रतिनिधिमा सर्वसम्मत चयन भइसकेका छन्।
सुर्खेतमा लामो समय जिल्ला सभापति रहेका तथा ०७० को चुनावपछि सञ्चार राज्यमन्त्री भएका तप्तबहादुर बिष्टको परिवार पनि राजनीतिमा सक्रिय हुन थालेको छ। तप्तबहादुरको निधन भइसकेको छ।
यसपालि सुर्खेत क्षेत्र नम्बर २ बाट उनकी श्रीमती धनादेवी विष्ट महाधिवेशन प्रतिनिधि भएकी छन्। उनी यसअघि कांग्रेस राजनीतिमा सक्रिय थिइनन्।
