नेकपा एमालेका स्थायी कमिटी सदस्य अग्नि खरेलले नेपालको संविधानअनुसार दस प्रतिशतभन्दा बढी मत ल्याउने दलले प्रतिपक्ष बस्न पाउने व्यवस्था नेपाली कांग्रेसले गुमाएको आरोप लगाएका छन्।
सरकारलाई समर्थनको मत दिएको कांग्रेसले प्रतिपक्षीको हैसियत कानुनी र नैतिक दुवै दृष्टिले गुमाएको बताए।
‘पुष्पकमल दाहाल नेतृत्वको सरकारलाई विश्वासको मत दिएको कांग्रेसले के आधारमा प्रतिपक्षको दाबी गरेको हो, मैले बुझ्न सकेको छैन,’ उनले भने। कांग्रेस राजनीतिक धर्मबाट च्यूत भएको दाबी पनि उनले गरे।
मंगलबार बिर्तामोडस्थित आफ्नै निवासमा पत्रकारहरूसँग कुरा गर्दै खरेलले भने, 'कांग्रेस प्रमुख प्रतिपक्षमा बस्नु पर्थ्यो। अहिलेको सरकारलाई उहाँहरूको विश्वासको मत आवश्यक नै थिएन।’
एमाले, माओवादी केन्द्र, राष्ट्रिय स्वतन्त्र पार्टी (रास्वपा), राष्ट्रिय प्रजातन्त्र पार्टी (राप्रपा) र जनता समाजवादी पार्टी (जसपा) लगायतको गठबन्धन भएर सरकार चलाएपछि कांग्रेस प्रतिपक्षमा बस्नुपर्ने उनको भनाइ छ। सत्ता गठबन्धन दललाई विश्वासको मत दिने अनि प्रतिपक्ष पनि बस्ने दोहोरो चरित्र देखाएर कांग्रेस 'लोभी-पापी' बनेको उनको आरोप थियो।
'मेरो बुझाइमा कांग्रेसले सभामुख वा राष्ट्रपति पदको आशा गरेर विश्वासको मत दिएको हुन सक्छ,' उनले भने।
सभामुख नजितेपछि अब कांग्रेसले राष्ट्रपतिका लागि अन्तिम प्रयास गर्ने उनले बताए। राष्ट्रपति जितेन भने कांग्रेसले सरकारलाई दिएको समर्थन फिर्ता लिएर प्रमुख प्रतिपक्षी दलको भूमिका निर्वाह गर्ने नेता खरेलले अनुमान लगाएका छन्।
