नेकपा एकीकृत समाजवादीका अध्यक्ष तथा सांसद माधवकुमार नेपालले अर्थतन्त्रको संकट देखाएका छन्।
प्रतिनिधि सभाको सोमबारको बैठकमा अध्यक्ष नेपालले अर्थतन्त्रका १५ वटा संकटको पहिचान गरेका हुन्।
उनले अहिले न्यून आर्थिक वृद्धि, उच्च मुद्रास्फिति, बढ्दो मूल्यवृद्धि, जनशक्ति पलायन, लगानी न्यून हुने अवस्था र न्यून पुँजीगत खर्च हुने अवस्था देखाएका हुन्।
त्यस्तै तरलताको संकुचन, घट्दो राजश्व परिचालन, उच्च ब्याजदरले पीडित हुने समस्या, बाह्य क्षेत्रमा सन्तुलनको चापको समस्या, भुक्तानी श्रृंखला टुटेको र जमिन बाँझिइरहेका कारण अर्थतन्त्र संकटमा पुगेको बताएका छन्।
खाद्यसंकट बढ्दै गएको, योजनाको उचित छनोट र प्राथमिकता निर्धारण हुन नसक्दा अर्थतन्त्रमा समस्या उत्पन्न भएको कुरा नीति कार्यक्रमले बोकेको बताएका हुन्।
उनले मुलुकमा चरम अराजकता विद्यमा रहेको बताउँदै इमान्दारिता र मिहेनतको संस्कृतिमा कमी आएको बताए ।
त्यस्तै नेपालले प्रमुख प्रतिपक्षी दलका नेता केपी शर्मा ओलीले नीति कार्यक्रमलाई गतिहीनको संज्ञा दिएका थिए। उनले नीति, कार्यक्रम कागजको खोस्टो मात्रै नभएको बताए।
नीति कार्यक्रमले अर्थतन्त्रको पुनरुत्थान गर्ने, राज्यका सबै तहमा सुशासनको प्रत्याभूति गर्ने र विकास निर्माण कार्यमा तीव्रता दिने लक्ष्य बोकेको पनि बताए। त्यस्तै सेवा प्रवाहमा सरलीकरण गर्ने, सामाजिक न्यायको प्रवर्द्धन गर्ने, राष्ट्रिय हितको संरक्षण र सम्बर्द्धन गर्ने उद्देश्यका रूपमा नीति कार्यक्रम अगाडि आएको बताए।
उनले नीति कार्यक्रमले राष्ट्रिय सार्वभौमसत्ताको समृद्धता, भौगोलिक अण्डताको लक्ष्य, स्वतन्त्र, स्वाधीनता, राष्ट्रिय हितको संरक्षण नीति कार्यक्रमको लक्ष्य रहेको पनि बताए।
संविधान र संघीयताको प्रभावकारी कार्यान्वयन कसरी गर्ने? अर्थतन्त्रको संरचनात्मक सुधार, सार्वजनिक खर्चमा मितव्ययिता, पुँजीगत खर्चमा वृद्धि गर्ने कुरा नीतिगत प्राथमिकतामा रहेको उनले बताए।
गुणस्तरीय पूर्वाधार निर्माण, शासकीय व्यवस्था र सेवा प्रवाहमा सुधार, भ्रष्टाचार नियन्त्रण, उत्पादन र रोजगारी वृद्धि, हरीत अर्थतन्त्र निर्माण नीति कार्यक्रमको आधारभूत नीति भएको उनको दाबी छ।
पर्यावरणीय सन्तुलन, आर्थिक, सामाजिक विभेदको अन्त्य, गरिबी निवारण, समावेशी विकास, शान्ति प्रक्रियालाई तार्किक निष्कर्षमा पुर्याउने, मुलुकको राष्ट्रिय हितको रक्षा, स्वतन्त्र र सन्तुलित परराष्ट्र नीति अवलम्बन गर्ने कार्यक्रम बोकेको हुनाले कागजको खोस्टो नभएको उनको तर्क थियो।
