नेकपा (माओवादी केन्द्र) का सांसद माधव सापकोटाले नक्कली भुटानी शरणार्थी प्रकरणमा नाम जोडिएका सरकारी अधिकारीहरूले निश्चित अवधिका लागि सम्बन्धित पद छोडेर अनुसन्धानमा सघाउनुपर्ने बताएका छन्।
बुधवार संघीय संसद भवन नयाँ बानेश्वरमा सञ्चारकर्मीहरूसँग संक्षिप्त कुराकानी गर्दै उनले नाम जोडिएकाहरू सबैले आफैं प्रहरीसमक्ष गएर अनुसन्धानमा सघाउन पनि उनले आग्रह गरे।
उनले भने, ‘यो प्रकरणको पहरो प्रधानमन्त्रीसम्मै तानियो भने पनि पछाडि हट्नु हुँदैन। ज-जसका नामहरू आइराखेका छन्, सबभन्दा राम्रो कुरा के हुन्छ भने यदि उहाँहरूलाई विवादमा मात्रै पारिएको भन्ने उहाँहरूको तर्क हो भने नैतिकताका हिसाबले प्रहरीमा आफैं गएर आफैंले बयान दिने। होइन भने नैतिकताको शिक्षा पनि हुन्छ नि।'
उनले थप भनेका छन्, 'ज-जसका बारेमा प्रश्नहरू उठेका छन् प्रहरीले उहाँहरूलाई नियन्त्रणमा लिएर अनुसन्धान गर्नुपर्यो या त उहाँहरू आफैं प्रहरीको सम्पर्कमा जानुपर्यो। त्यो नै सबभन्दा राम्रो हो। जो-जो बहालवाला पदमा हुनुहुन्छ, उहाँहरूले त झन् निश्चित अवधिका लागि त्यो पदीय जिम्मेवारी छोडेर 'अनुसन्धान गर्नुहोस्' भनेर मार्गप्रशस्त गर्नु सबभन्दा धेरै नैतिक पाठ हुन्छ जस्तो लाग्छ। सरकारले दबाब लिनु हुँदैन यसमा। हामी त प्रधानमन्त्रीलाई के सुझाव दिइराखेका छौं भने, यो भ्रष्टाचारको विषय छानबिन गर्दै जाँदा सरकार ढलेछ भने पनि त्यसका लागि तयार हुनुपर्छ।’
