नेपाली कांग्रेसका सभापति शेरबहादुर देउवाले पार्टीका २८ विभाग गठनको प्रक्रिया सुरू गरेका छन्।
सभापति देउवाले केन्द्रीय सदस्य मीनबहादुर विश्वकर्मालाई सूचना, सञ्चार तथा प्रचार विभाग प्रमुखको जिम्मेवारी दिएका हुन्।
‘सभापतिज्यूले आज बिहान फोन गरेर प्रचार विभाग तपाईंले सम्हालेर काम अघि बढाउँदै गर्नुपर्यो भन्नुभएको छ,’ उनले भने।
मुख्यसचिव कृष्णप्रसाद पौडेलले विज्ञप्ति निकालेर केन्द्रीय सदस्य विश्वकर्मालाई सभापति देउवाले सूचना, सञ्चार तथा प्रचार विभाग प्रमुखकको जिम्मेवारी दिएको जानकारी गराएका छन्।
विश्वकर्मालाई १४ औं महाधिवेशनपछि सभापति देउवाले केन्द्रीय सदस्यमा मनोनीत गरेका थिए। महाधिवेशनमा उनी सहमहामन्त्री पदमा उठ्ने चर्चा थियो। तर सभापति देउवाको टिममा नपरेपछि उनी असन्तुष्ट थिए।
सभापति देउवाले महाधिवेशन भएको ६ महिनाभित्र विभागलाई पूर्णता दिनुपर्नेमा अहिलेसम्म नबनाउँदा आलोचना भइरहेको छ।
प्रकाशित मिति: शुक्रबार, जेठ १२, २०८०, १३:०३:००
