प्रमुख प्रतिपक्षी दल नेकपा एमालेले विरोध गरेपछि रोकिएको प्रतिनिधि सभाको बैठक भोलि ४ बजेसम्मका लागि स्थगित भएको छ।
दलहरूबीच संसद पुन:सञ्चालन गराउने विषयमा सहमति जुट्न नसकेपछि सभामुख देवराज घिमिरेले सूचनामार्फत् बैठक स्थगित गरेका हुन्।
शुक्रबारको बैठक सभामुखले सुरू गर्नेबित्तिकै एमालेका सांसदहरू उठेका थिए। त्यसपछि एमाले प्रमुख सचेतक पदम गिरीलाई सभामुखले बोल्न समय दिए।
गिरीले पशुपतिको मन्दिरको जलहरीका विषयमा एमालेलाई आधारहीन आरोप सत्तापक्षीय सांसदले लगाएकोमा उक्त रेकर्ड हटाउनुपर्ने र सांसदले माफी माग्नुपर्ने अडान राखेका थिए।
यसअघि प्रतिनिधि सभामा बोलेका नेकपा माओवादी केन्द्रका सांसद लेखनाथ दाहालले एमालेप्रति लक्षित गर्दै 'पशुपतिमा सुनको जलहरि राख्ने भनेर पित्तलको जलहरि राखी भ्रष्टाचार गरेको' आरोप लगाएका थिए।
त्यसपछि एमाले सांसदहरू बसेका ठाउँबाट पुन: उठेका थिए। एमाले सांसदहरूले यसबारे सरकारले जवाफ राख्नुपर्ने मागसमेत गरेका छन्।
सभामुखले माओवादी प्रमुख सचेतक हितराज पाण्डेलाई बोल्न समय दिएपछि एमाले सांसदहरूले नाराबाजीसमेत गरेका थिए।
२० मिनेटका लागि स्थगित भनिएको बैठक ४ घन्टा बढी समय बित्दा पनि सुरू हुन सकेको थिएन। संसद सचिवालयले निकालेको पछिल्लो सूचनामा बैठक साँझ ६ बजे बस्ने भनिएको थियो। तर उक्त समयमा पनि बैठक बस्न नसकेको हो।
प्रकाशित मिति: शुक्रबार, जेठ १२, २०८०, १९:२६:००
