नेपाली कांग्रेसका सांसद रमेश लेखकले सरकारमा हुँदा देश झिलिमिलि र विपक्षी हुँदा अन्धकारमय देखिने गरेको बताएका छन्।
शनिबार प्रतिनिधि सभाको बैठकमा नीति तथा कार्यक्रममाथिको छलफलको क्रममा बोल्दै सांसदका पुराना मानसिकता र मनस्थितिबाट मुक्त नभएसम्म कार्यक्रमहरू कार्यान्वयन नहुने बताएका हुन्।
उनले सत्तापक्षमा बस्दा देश झिलिमिलि देखेपनि विपक्षमा बस्नुपर्दा अन्धकार देख्ने गरेको बताए।
‘दुई मिटर दुरीको समस्या छ। सभामुखको दाहिने तर्फ छेउको कुर्सीमा बस्दा यो देश झिलिमिलि देखिन्छ। सबैकुरा राम्रो देखिन्छ। सबै कुरा गज्जब हुन्छ,’ उनले भने, ‘तर समय परिस्थिति संयोगले त्यो कुर्सीको दुई मिटर उता गएर अर्को कुर्सीमा बस्नुपर्दा यो देश अन्धकारमय देखिन्छ।’
उनले थपे, ‘यो मानसिकता र मनस्थितिबाट मुक्त हुन सकेनौं भने नीति तथा कार्यक्रमलाई हामीले जति निबन्धमा लेखेपनि कार्यान्वयन हुँदैन, नेपाली जनता सम्म पुग्दैन।’
पछिल्ला सरकारबाट बन्ने गरेका कार्यक्रमहरूमा धेरै परिवर्तन नहुने र कार्यान्वयनका समस्या हुने पनि उनले बताए।
त्यस्तै उनले कतिपय कार्यक्रम पढ्दा स्वार्गानुभूति हुने गरेको भन्दै प्रतिपक्षी दलका नेता केपी शर्मा ओलीमाथि पनि व्यंग्य गरेका छन्।
‘कतिपय नीति तथा कार्यक्रम पढ्दा स्वर्गानुभूति हुन्छ। स्वर्गमा पुगेको आनन्द हुन्छ। मृत्युपछिको स्वर्गानुभूति होइन, जीवनभित्रकै। म त महाकाली नदी किनाराको मानिस एकपटकको नीति तथा कार्यक्रम पढ्दा मलाई स्वर्गको अनुभूति भयो,’ उनले भने, ‘नीति तथा कार्यक्रम पढ्दैथिएँ। कञ्चनपुरबाट पानीजहाज चढेर डडेल्धुरा हुँदै बैतडी भएर दार्चुलासम्म पुग्ने अनुभूति मैले गरेँ। मलाई बडो स्वर्गको जस्तो अनुभूति भयो।’
पानीजहाज पनि चानचुने नभई नर्वेजियन क्रुज हुने अनुमान गरेको तर दार्चुलाको महाकाली नदीमा तुइन चुँडिएर जयसिंह धामी बेपत्ता भएको घटनाले भने धरातलमा झरेको बताए।
‘यो नीति कार्यक्रम त्यो दिन म झस्याङ्ग भएर हाम्रो यथार्थ र धरातलमा झरेँ। जुनदिन महाकाली नदीमा मजस्ता मानिस पानीजहाजमा चढेको होइन। तुइनबाट लडेर जयसिंह धामी महाकाली नदीमा डुबेर मरे,’ उनले भने।
