नेकपा एकीकृत समाजवादीका सांसद मेटमणि चौधरीले असहमतिको नाममा ठिक कुरालाई पनि बेठिक भन्ने प्रवृत्ति छाड्न एमालेलाई आग्रह गरेका छन्।
शनिबार प्रतिनिधि सभामा सरकारको नीति तथा कार्यक्रममाथिको छलफलमा बोल्दै चौधरीले नीति तथा कार्यक्रम पुनर्लेखन गर्नुपर्ने एमालेको माग बेतुक रहेको बताउँदै पुनर्लेखनको मागबाट बाहिर निस्कन आग्रह गरेका हुन्।
संसदमा सत्तापक्षले नीति तथा कार्यक्रम पारित गराउन खोज्नु र प्रतिपक्षले असहमति जनाउने सामान्य परम्परा भएपनि असहमितका नाममा ठिकलाई पनि बेठिक भन्नु गलत हुने उनको भनाइ छ।
'अर्थतन्त्रको पुनरूत्थानको कुरा, राज्यको सबै तहमा सुशासनको प्रत्याभुति, विकास निर्माणमा तीव्रता, सेवा प्रवाहमा सरलीकरण आदी कुरा बेठिक हो ? यसलाई पुनर्लेख गर्ने कुरा ठिक हुन्छ?, चौधरीले भने, ' असहमतिका नाउँमा अनावश्यक निहुँ खोज्नु ठिक होइन।'
चौधरीले समाजवाद उन्मुख अर्थतन्त्रको कुरा ०७५ सालदेखि भइरहेको तथा समावेशी प्रणालीलाई संस्थागत गर्ने र यसलाई सरकारको मुख्य कार्यभारको रूपमा प्रस्तुत निरन्तर गरिरहेका बताए ।
'०७५ सालमा धेरै राम्रो थियो, त्यसपछि क्रमश राम्रो भनिएको कुरा ०८० सालमा बेठिक?' उनले भने, ' यसैका लागि रिराइट गर्नुपर्ने ?'
