प्रधानमन्त्री पुष्पकमल दाहाल प्रचण्डले नयाँहरू पनि पुरानो हुन्छन् भन्दै टिप्पणी गरेका छन्।
शनिबार प्रतिनिधि सभाको बैठकमा नीति तथा कार्यक्रममाथि उठेका प्रश्नको जवाफ दिनेक्रममा नयाँहरू पनि कुनै समयमा पुरानो हुने टिप्पणी गरेका हुन्।
राष्ट्रिय स्वतन्त्र पार्टीका सांसद मनिष झाले प्रधानमन्त्री प्रचण्डले आफ्नो अन्तिम पटक हो भन्ने टिप्पणीलाई लिएर धन्यवाद दिएका थिए। झाले उक्त भनाइ प्रति कृतज्ञता व्यक्त गर्दै नयाँ पुस्ता तयार भइसकेको बताएका थिए।
त्यसको जवाफमा प्रधानमन्त्री प्रचण्डले नयाँ पनि पुराना हुने भन्दै नबिर्सनका लागि अनुरोध गरेका हुन्।
‘मलाई एक जना माननीयले धन्यवाद भन्नुभयो। किनभन्दाखेरि मैले सायद मेरो अन्तिम हुन्छ भनेर भनेको थिएँ। त्यसो भन्दा उहाँले इमानदारीपूर्वक भनेको भनेर धन्यवाद भन्नुभयो। हामी नयाँ तयार भइसक्याछौं भन्नुभएको छ,’ उनले भने, ‘नयाँ तयार भएकोमा बधाई छ। तपाईंहरू आउनुहोस् अगाडि, मैले त नयाँलाई ल्याउनै चाहेको छु। तर नयाँ साथीहरूलाई पनि धर्यधारण गर्दै नयाँ पनि पुराना भइन्छ भन्ने नबिर्सिन पनि अनुरोध गर्न चाहन्छु।
