प्रधानमन्त्री पुष्पकमल दाहाल प्रचण्डले उज्जैनको धार्मिक स्थलमा गेरू वस्त्र नलगाएको भए भारतीयको मनमा चिसो पस्ने बताएका छन्।
शनिबार चार दिने औपचारिक भारत भ्रमणपछि काठमाडौं फर्केर पत्रकार सम्मेलनमा बोल्दै गेरू वस्त्र नलगाएको भए अर्बौं भारतीयको मनमा चिसो पस्ने उनले बताए।
उनले यसलाई धार्मिक कूटनीतिको रूपमा लिन पनि आग्रह गरे।
‘म कम्युनिष्टमात्रै होइन प्रधानमन्त्री पनि हो नि। सेक्युरिटीले नलगाउन पाए हुन्थ्यो भनेर बल लगाए। तर त्यहाँ अतिथिले त्यो लगाउनुपर्ने प्रोटोकल रहेछ,’ उनले भने, ‘मैले नलगाउँदा भारतका करोडौं, अर्बौं मान्छेको मनमा चिसो पस्थ्यो।’
उनले थपे,‘गेरू वस्त्र, कमन्डल लिएर हिँड्नेवाला पनि होइन। यसलाई एउटा संस्कृतिको कूटनीतिको रूपमा लिऔं।’
यस्तै आफू कुनै पनि धर्मविरोधी नभएको पनि उनले प्रष्ट्याए। बरू धर्मनिरपेक्षवादी भएको उनले बताए।
आफू मुस्लिमहरूको मस्जिदमा, क्रिश्चियनको चर्च, बुद्धिस्टको धार्मिक स्थल लगायतमा समेत गएर प्रार्थना गरेको उनले बताए।
‘म मनैले धर्म निरपेक्षवादी हो। त्यो भनेको विरोधी होइन। म धर्मनिरपेक्षवादी भएकाले सबैलाई सम्मान गर्नुपर्छ,’ उनले भने।
त्यसैगरी रूद्राक्ष चढाएको विषयमा पनि उनले आफ्नी श्रीमतीको स्वास्थ्य अवस्था ठीक हुने भन्ने माग राखेर नचढाएको पनि प्रष्ट्याएका छन्।
परराष्ट्रमन्त्री एनपी साउदको प्रस्तावमा रूद्राक्ष लगेको र त्यसको पनि प्रवर्द्धन हुने हिसाबले लगेको उनको भनाइ थियो।