राष्ट्रिय प्रजातन्त्र पार्टीले बजेट छलफलपछि नागरिकता विधेयक प्रमाणीकरण र प्रधानमन्त्रीको भारत भ्रमणको विषयमा प्रतिनिधि सभामा छलफल गाराउन माग गर्दै स्थगित प्रस्ताव दर्ता गराएको छ।
प्रतिनिधि सभा नियमावलीको नियम ७४ मा अत्यन्त जरूरी सार्वजनिक महत्वको कुनै विषयमा छलफल गर्न सदस्यले बैठकको कार्यक्रम स्थगित गर्ने प्रस्ताव राख्ने व्यवस्था छ। तर यस्तो प्रस्ताव सभामुखको अनुमतिले मात्र संसदमा पेश हुन्छ।
राप्रपाका प्रमुख सचेतक ज्ञानेन्द्र शाहीले प्रधानमन्त्रीको भारत भ्रमणमा 'मुलुकको हितविपरीत कार्य गरेको भन्ने कुरा उठेकाले' संसदको कार्यक्रम स्थगित गर्न प्रस्ताव गरेका हुन्।
तर प्रतिनिधि सभाका सभामुखले नियम अनुकूल भए नभएको हेरेर यस्तो प्रस्ताव स्वीकृत वा अस्वीकृत गर्नुपर्ने र त्यस्तो जानकारी प्रस्तावक सदस्यलाई दिनुपर्ने व्यवस्था छ। त्यस्तै सभामुखले त्यसरी सांसदले उठाएको विषयमा कुनै सदस्य वा मन्त्रीबाट जानकारीसमेत लिन सक्ने व्यवस्था छ।
संसदको बैठक तय भएको दिनको दुई घन्टाअघि संसद सचिवालयलाई यस्तो सूचना दिनुपर्ने प्रावधान प्रतिनिधि सभाको नियमावलीमा छ।