माओवादी केन्द्रका सांसद माधव सापकोटाले राष्ट्रपति रामचन्द्र पौडेलले प्रमाणीकरण गरेको नागरिकता विधेयकलाई लिएर प्रमुख प्रतिपक्षी दलले हंगामा मच्चाउनु् जायज नभएको बताएका छन्।
नेकपा (एमाले)लगायत विपक्षी दलले नागरिकता विधेयक प्रमाणीकरणलगायत विषयलाई लिएर आज संसद बैठक चल्न दिएनन्। भोलि बिहान ११ बजेसम्म बैठक स्थगित छ।
आफ्नो पालामा अध्यादेश नै ल्याएर कानुन बनाउन खोज्ने एमालेले अहिले संसदमा हंगामा मच्चाउनु जायज नभएको तर्क सापकोटाले गरेका हुन्।
‘संसदमा दुई-दुईपटक छलफल भएर, प्रक्रिया पूरा गरेर राष्ट्रपतिकहाँ प्रमाणीकरण हुनमात्र बाँकी रहेको विषय हो। अझ यही विषय त प्रमुख प्रतिपक्षी दलको नेता प्रधानमन्त्री हुँदा अध्यादेशमार्फत् नै ल्याउनु भएको थियो,’ संसद् भवन बाहिर सञ्चारकर्मीमाफ सापकोटाले भने, ‘भलै त्यसबेला एउटा प्रक्रिया अगाडि गयो र त्यसले सार्थकता प्राप्त गरेन। पछि दुईपटक सदनबाट प्रक्रिया पूरा गरेर गएको हो।आज उहाँहरूले त्यही विषयलाई लिएर संसद् अवरूद्ध गरिराख्नु भएको छ। संवाद त भइराखेकै छ, मलाई लाग्छ, उहाँहरूले जुनस्तरबाट उहाँहरूले उठाइराख्नु भएको छ, धेरै जायजचाहिँ होइन।’
अघिल्लो चरणमा सरकार बनाउने राजनीतिक स्थिरता कायम गर्ने नै गोलचक्करमा समय खर्च भएको भन्दै यसपटक धेरै लम्ब्याएर लैजाने भन्दा टुंग्याउने विषयमा सरकार अघि बढेको पनि बताए।
‘यही सार्वभौम अधिकार भएकै संसद्ले दुईदुईपटक प्रक्रिया पूरा गरेर त्यहाँ लगेको हो, त्यसो हुँदा राष्ट्रपतिले प्रमाणीकरण गरिदिए भइहाल्यो नि, भन्ने तहबाट समझदारी भएकै हो,’ उनले भने, ‘प्रमुख प्रतिपक्षीले संसद्मा हंगामा गर्नका लागि एउटा विषय बनाएको छ। उहाँहरूले प्रक्रिया मिलेन भनेर आफ्ना कुरा त राख्न पाउनुभयो, दलले पनि राख्न पाउँछ, स्वयं सांसदहरूले पनि राख्न पाइहाल्नुहुन्छ, तर संसदै अवरुद्ध गर्ने, वेल घेराउ गर्न जाने आदि गर्नुभयो, त्योचाहिँ जायज होइन।’
आजको संसद् बैठक प्रमुख प्रतिपक्षी दल एमाले, राष्ट्रिय स्वतन्त्र पार्टी, राष्ट्रिय प्रजातन्त्र पार्टीलगायतले अवरूद्ध गरेका थिए।
संसद् बैठक भोलि बिहान ११ बजे बोलाइएको छ।
प्रतिनिधि सभाको आजको बैठकमा बजेटमाथि छलफल सुरू गर्ने कार्यसूची थियो।
