नेकपा एमालेका सांसद योगेश भट्टराईले जमिन साँट्ने नाउँमा राष्ट्रियता बन्धकमा राख्न नसकिने बताएका छन्।
सोमबार प्रतिनिधि सभामा भट्टराईले प्रधानमन्त्रीको भारत भ्रमणमा सीमा समस्याबारे भएको छलफलका विषयमा प्रश्न गर्दै कुनै जग्गा सट्टा गर्ने नाउँमा राष्ट्रियता बन्धक राख्न नसक्ने बताएका हुन्।
प्रधानमन्त्री प्रचण्डले भारतीय प्रधानमन्त्री नरेन्द्र मोदीसँग नेपाल-भारत सीमा समस्या हल गर्न बंगलादेश मोडलबारे चर्चा भएको बताएका थिए।
प्रधानमन्त्रीको सोही अभिव्यक्तिबारे प्रश्न गर्दै भट्टराईले कुनैपनि सर्तमा नेपालको संविधानले नेपालको भूमि अरू कुनै विदेशीलाई दिने हक नदिएको बताए।
'उहाँले के आधारमा बंगलादेशको बाटोको कुरा गर्नुभयो? हामी कुनै जग्गा सट्टा गर्ने नाउँमा राष्ट्रियता बन्धक राख्न सक्दैनौं। बेच्न सक्दैनौं,' उनले प्रश्न गरे।
उनले परिस्थिति विग्रन्छ भनेर देशको मुख्य समस्या नै उठाउन नहुने भन्ने नहुने बताए।
'इपिजीको र सीमाको बारेमा प्रश्न उठाउँदा परिस्थिति बिग्रन्छ भने, पञ्चेश्वरको बारेमा प्रश्न उठाउँदा परिस्थिति बिग्रन्छ मधेशमा हाम्रो जमिन डुबान भएको कुरा उठाउँदा परिस्थिति बिग्रन्छ भने के उठाउँदा परिस्थिति सहज हुन्छ?' उनले सोधे।
