नेकपा (एमाले)का अध्यक्ष केपी शर्मा ओलीले सीमा समस्या समाधानमा भूमिको लेनदेनको विषय उठ्नु दुर्भाग्य भएको बताएका छन्।
प्रतिनिधि सभाको सोमबारको बैठकमा उनले समुद्रसँगको पारवहनको सुविधा भूमि सट्टापट्टाको विषय नभई अधिकारको विषय भएको बताएका हुन्।
‘बंगलादेश जाने बाटोसँग लिपुलेक–लिम्पियाधुरा सट्टापट्टा गर्न सकिने कुराले देश तरंगित छ। सश्वर आएको छ,’ उनले भने, ‘बंगलादेश जाने बाटो या पारवहनको सुविधा सट्टापट्टाको विषय होइन, त्यो अधिकारको विषय हो।’
बंगलादेशको बन्दरगाहसम्म पुग्ने कुरा पहिले नै टुंगिसकेको उनका भनाइ थियो।
‘यो कुरा पहिले नै टुंगिएर बंगलादेश, भुटान, भारत, नेपाल यी चार देशको संगठन जस्तो बिबिआइएन बनेको थियो। ढुवानी र आवागमनका लागि सहमतिहरू पनि भए। कार्यान्वयनका बेला भुटान पछि हट्यो। पछि बिआइएनमात्रै भन्न थालियो,’ उनले भने।
बंगलादेशसम्म आवतजावत गर्नेगरी बस सेवासमेत उद्घाटन भइसकेको ओलीले बताए।
‘त्यसकारण यो नयाँ होइन। बंगलादेशसम्म जानका लागि आफ्नो जमिन दिनुपर्छ भन्ने कुरा प्रचलनमा नभएको कुरा हो। बंगलादेशमात्रै होइन, अफगानिस्तान जाने बाटो पाउने कि नपाउने? पाकिस्तान जान अमृतसरतिरबाट बाटो पाएका छौं त, त्यसकारण यो बंगलादेशमा जाने बाटोका लागि भनेर उच्चारण हुनु नै गलत हो,’ उनले बताए।
हुनै नसक्ने विषय नेपालको तर्फबाट भारत भ्रमणका बेला कमजोर ढंगले उठेको उनको टिप्पणी थियो।
एमाले अध्यक्ष ओलीले बंगलादेश मोडलमा भूमि लेनदेन नभएको पनि बताए। आ-आफ्नो जमिनमा फर्किएर समाधान गरिएको उनको तर्क थियो।
‘कुनै पनि देशको सरकारलाई आफ्नो जमिन अर्कालाई दिने अधिकार हुँदैन, संविधानमा हुन सक्ने कुरा होइन, कहीँको संविधानमा पनि यस्तो हुँदैन, यस्तो कुरा उठ्नु दुर्भाग्य हो,’ उनले भने।
1626183247.jpg)
