प्रमुख प्रतिपक्षी दल नेकपा एमालेका संसदीय दलका नेता केपी शर्मा ओलीले प्रधानमन्त्रीको भारत भ्रमणमा प्रोटोकल फितलो भएको बताएका छन्।
सोमबार प्रतिनिधि सभा बैठकमा बोल्दै ओलीले प्रधानमन्त्री प्रचण्डले भारतीय पक्षसँग छलफल गर्दा सरकारका मन्त्री र कर्मचारीभन्दा आफ्नी छोरीलाई प्राथमिकतामा राखेकोबारे प्रश्न उठाएका हुन्।
उनले प्रोटोकल अनुसार दुई देशका कार्यकारीबीच छलफल हुँदा प्रधानमन्त्रीको छेउमा परराष्ट्रमन्त्री, अन्य मन्त्रीहरू र परराष्ट्र मन्त्रालयका कर्मचारी हुनुपर्नेमा छोरी बस्नुले प्रोटोकल मिचिएको बताए।
'उहाँको छेउमा पिए छोरी राख्नुभएको छ, परराष्ट्रमन्त्री राख्नुभएको छैन। परराष्ट्र सचिव छैन। परिवारको सदस्य राख्नुभएको छ,' ओलीले भने।
उनले अन्य देशका कार्यकारी प्रमुखहरूले विदेश भ्रमण गर्दा श्रीमतीलाई लिएर जाने गरेको पनि सुनाए। 'फर्स्ट लेडी परिवारको सदस्य हुँदैन। भोली नाति नातिनी लिएर जानुभयो भने के भन्ने?,' उनले प्रधानमन्त्रीलाई प्रश्न गरे।
प्रोटोकललाई भद्रगोल बनाउन नहुने ओलीको भनाइ छ। 'यस्तो तौरतरिकाले विदेश सम्बन्धहरू हुन्छ?,' उनले प्रधानमन्त्रीलाई प्रश्न गरे।
ओलीले विदेश भ्रमणलाई मर्यादित अफिसियल बनाउनुपर्नेमा प्रधानमन्त्रीको भ्रमण के हो भन्न् छुट्याउन नसकिएको बताए।
'यो त फेमिली हो कि, धार्मिक हो कि, धार्मिक पर्यटकीय हो कि, तीर्थाटन हो,' उनले भने, 'कहीँ हेर्यो फेमिली भिजिटजस्तो देखिन्छ। यस्तो कमजोर प्रस्तुती नेपालको हुनुहुँदैन।
