नेकपा (एमाले)का प्रमुख सचेतक पदम गिरीले बिचौलियाको स्वार्थमा बजेट बनेको सुन्नु दुर्भाग्यपूर्ण भएको बताएका छन्।
‘नागरिकले रगतपसिना गरेर जम्मा गर्ने राजस्व लुटपाट गर्ने काम हुन्छ, यसले आम जनतामा निराशा पैदा गर्ने काम गरेको छ। बिचौलिया राखेर करको दर तलमाथि गर्ने काम भएको छ,’ उनले प्रतिनिधि सभाको मंगलबारको बैठकमा भने।
बजेट बन्दै गर्दा त्यहाँ निश्चित मानिसहरू बस्ने प्रावधानविपरीत उनले बिचौलिया छिराएको आरोप लगाए।
‘त्यहाँ प्रधानमन्त्रीका स्वकीय सचिवदेखि लिएर, आधिकारिक, अनाधिकारिक सबै खालका मानिसहरू भित्रबाहिर गरिरहेका छन्। भित्रबाट बाहिर फोन लगाइरहेका हुन्छन्। त्यहाँ कुनै गोपनीयता कायम गरेको हुँदैन, यस्तो भएको कुरा बाहिर आएको छ, अर्थमन्त्रीले बजेट भाषण गर्ने बेलामा ल्याएको ब्रिफकेसमाथि रातो रिबन बाँधेर के गर्ने, त्यहाँ बजेट बनाउँदा बिचौलिया बसेका हुन्छन्,’ उनले भने, बिचौलियाको स्वार्थमा बजेट बनेको हुन्छ भन्ने हामीले सुन्नुपर्दा त्यो भन्दा दुर्भाग्य के हुन्छ?’
उनले बजेट भाषणपूर्व अर्थमन्त्रिले करको दर परिवर्तनबारे सूचना चुहाएको आरोपसमेत लगाए।
गत जेठ १४ गते राति बजेट बनाउने क्रममा पूर्वनायब सुब्बा रामकृष्ण श्रेष्ठलाई प्रवेश गराएर करको दर स्वार्थअनुकूल हेरफेर गरिएको विपक्षी दलका सांसदले आरोप लगाएका छन्।
अहिले प्रतिनिधि सभा बैठकमा अर्थमन्त्री प्रकाशशरण महतले जवाफ दिइरहेका छन्।