नक्कली भुटानी शरणार्थी प्रकरणबारे खबरदारी गर्न बृहत नागरिक आन्दोलनका प्रतिनिधिले उपप्रधान एवं गृहमन्त्री नारायणकाजी श्रेष्ठसँग भेटेका छन्।
शुक्रबार दिउँसो गृहमन्त्रालय पुगेर बृहत नागरिक आन्दोलनका प्रतिनिधिहरूले मन्त्री श्रेष्ठलाई भेटेर खबरदारी गरेका हुन्।
गृहमन्त्री श्रेष्ठलाई भेट्न नागरिक अभियन्ताहरू सन्जिव उप्रेती, केशव सिग्देल, युवराज घिमिरे, शिशिर उप्रेती, रक्षा बम, प्रेम चलाउने, पवन थापा लगायत मन्त्रालय पुगेका थिए।
उनीहरूले एक ज्ञापन पत्र समेत बुझाएका थिए। जसको मूल प्रश्न थियो- नक्कली शरणार्थी प्रकरणलाई यत्तिकै सामसुम पार्न खोजिएको त होइन?
यसको जवाफमा गृहमन्त्री श्रेष्ठले बलियो प्रमाण-अभियोजनसहित मुद्दा परेकाले यस प्रकरणमा अभियुक्तहरूले अदालतबाट पनि उम्किन नसक्ने विश्वास व्यक्त गरेका थिए।
यस्तै भ्रष्टाचार नियन्त्रण तथा आर्थिक सामाजिक रूपान्तरणका लागि नागरिक आन्दोलनले सडकमै उपस्थित भएर खबरदारी गर्नुपर्नेमा पनि गृहमन्त्री श्रेष्ठले बताएका थिए।
मुद्दा अदालतमै पुगिसकेको भएपनि बयानका क्रममा थुप्रै व्यक्तिहरूको नाम पोलिएको हुँदा अनुसन्धान पनि जारी नै रहने उनले दाबी गरे।
आफूलाई कतिपयले 'सधै गृहमन्त्री होलास् र? थुनिएकाहरू निस्किदा तेरो के होला?' भन्ने गरेको कुरा पनि उनले सुनाएका थिए।
त्यसक्रममा बरू सहिदको लाममा मिसिन तयार हुने तर सुशासन र जनसेवाका लागि लडिरहने उनले बताए।
ठोस तथ्य-प्रमाण बिना अभियुक्तले बयानमा पोलेकाहरूसम्म पुग्दा मुद्दा कमजोर बन्ने सम्भावनाप्रति सरकार सजग रहेको समेत उनले बताएका थिए।
