अर्थमन्त्री प्रकाशशरण महतले संसदीय क्षेत्र पूर्वाधार विकास कार्यक्रमको ५ करोड रुपैयाँ खर्च नलिनेहरूको पुँजीगत खर्चमा जोडिने बताएका छन्।
उनले सोमबार प्रतिनिधि सभाको बैठकमा आर्थिक वर्ष २०८०/०८१ को बजेटमाथि उठेका प्रश्नको जवाफ दिनेक्रममा ५ करोड रुपैयाँ नलिने सांसदको रकम पुँजीगत खर्चमा जोडिने बताएका हुन्।
‘कति माननीयज्यूहरूले यो हामी लिन चाहदैनौं आफै गर्नुस् भन्नुभएको छ। कसैले उपयोग गर्न चाहेन भने त्यो रकामान्तरण भएर पुँजीगत खर्च त गर्न मिलिहाल्छ नी,’ उनले भने, ‘त्यसकारण जो माननीयज्यूहरूले यसमा सहभागी हुन, सिफारिस गर्न चाहनुहुन्न भने हामी पुँजीगत खर्चको रूपमा प्रयोग गर्छौं।’
उनले यसबारे बाहिर सांसदहरूले खल्तीमा राख्नको लागि विनियोजन गरेको भनेर आलोचना भएको भन्दै गुनासो गरे।
‘बाहिर प्रचार कसरी भयो भने बजेटको मूल मक्सद, विशेषताहरू छन्। ती विशेषताहरूमा केन्द्रीत हुने भन्दा पनि बजेटको महत्वलाई कम गरेर देखाउने हिसाबले संसदीय क्षेत्र पूर्वाधार विकास कार्यक्रमलाई कोष, कोष, कोष भनियो,’ उनले भने,‘सांसदहरूले आफ्नो खल्तीमा राख्नलाई विनियोजित गरेको भनेर प्रस्तुत भयो। त्यो होइन।’
यो कार्यक्रम पहिलेको सांसद विकास कोषको मोडलमा नआएको पनि उनले बताए।