गृह मन्त्रालयले २८ जना शाखा अधिकृतको उपत्यका बाहिर सरूवा गरेको छ।
मन्त्रालयले काठमाडौं उपत्यका लगायत आकर्षक मानिएका कार्यालयमा रहेका २८ शाखा अधिकृतको सरूवा गरेको हो।
दुर्गम स्थानमा जान कर्मचारीहरू तयार नभएपछि बिहीबार उपप्रधानमन्त्री एवं गृहमन्त्री नारायणकाजी श्रेष्ठ आफैंले सबैलाई कार्यकक्षमा बोलाएका थिए।
उनले कर्मचारीहरुलाई बोलाएर सरूवा भएको ठाउँमा गएर काम गर्न निर्देशन दिएका थिए।
‘कर्मचारीहरू धेरैजसो अध्यागमन, विमानस्थल, कारागार विभाग वा अन्य कतै नभएपनि काठमाडौं उपत्यकामै बस्न रूचाउँछन्,’ स्रोतले भन्यो,‘त्यसो भएपछि मन्त्रालयले एकै पटक शाखा अधिकृतहरूको दुर्गम ठाउँमा सरूवा निकालेको हो।’
मन्त्रालयले अधिकृतकहरूको रौतहट, धादिङ, गुल्मी, जुम्ला, सर्लाही, सप्तरी, गोरखा, पश्चिम नवलपरासी, बाँके, ओखलढुंगा, पर्सा, सिन्धुपाल्चोक, उदयपुर, दोलखा, कपिलवस्तु, प्युठान, सोलुखुम्बु, अछाम, सुर्खेत, तनहुँ, कास्की र मोरङमा सरूवा गरेको हो।
यसअघि सरूवा भएपनि मन्त्रीले खासै चासो दिँदैन थिए। सचिवस्तरी निर्णय हुनेभएकाले यसबारे मन्त्रीसम्म खबर नपुग्ने गरेको स्रोतले बतायो। तर मन्त्री श्रेष्ठले बिहीबार सबैलाई कार्यालयमा बोलाएर दुर्गम स्थानमा गएर काम गर्न सुझाव दिएका थिए।
उनले काठमाडौंमा मात्रै बस्न चाहनेको सरूवा बदर नहुने पनि बताए।
‘काठमाडौंमा मात्रै बसेर दुर्गममा जान नचाहने, सरूवा बदर गर्न चाहने, नेताहरू भेट्ने, मन्त्रीहरू भेट्ने गर्न खोज्नुभयो भने त्यो बाटो बन्द भयो। संघीय मामिला मन्त्रालयलाई पनि बदर गर्न कोही कर्मचारी आउँछ भने त्यो नगर्नुस् भनिसकेँ,’ मन्त्री श्रेष्ठको भनाई उदृत गर्दै स्रोतले भन्यो।
