नेकपा माओवादी केन्द्रका उपमहासचिव एवं पूर्वअर्थमन्त्री वर्षमान पुन 'अनन्त' ले राजनीतिक नेतृत्व र पार्टीहरूमाथि समाज आलोचक बन्दै गएको र प्रश्नहरू उठेको बताएका छन्।
चीनमा चार महिना लामो उपचार गरेर स्वदेश फर्किएपछि शुक्रबार अन्तर्राष्ट्रिय विमानस्थलको विशिष्ट कक्षमा पार्टी नेता कार्यकर्ता र शुभचिन्तकहरूसँग कुरा गर्दै दल र नेताहरूले आलोचनालाई नकारात्मक रूपमा लिन नहुने उल्लेख गरे।
लोकतन्त्रमा जनताको प्रश्नभन्दा बाहिर कोही पनि हुन नसक्ने भन्दै उनले आफूमाथिका प्रश्नहरूको राजनीतिक दल र नेताहरूले व्यवहारबाटै जवाफ दिन सक्नुपर्ने तर्क गरे।
राजनीतिक दल र नेताहरू नयाँ अग्नि परीक्षामा रहेको भन्दै पुनले जनताका एक/एक प्रश्न र आशंकाहरूको जवाफ सबैले दिनुपर्नेमा जोड दिए।
‘नेपाली समाज आलोचक बन्दै गएको छ। राजनीतिमाथि, नेताहरूमाथि र राजनीतिक दलहरूमाथि प्रश्न उठेको छ। प्रश्न उठ्नु नराम्रो होइन’, पुनले भने, ‘तर, प्रश्नहरूको सकारात्मक जवाफ दिनु राजनीतिक दल र नेताहरूको कर्तव्य हो। राजनीतिक व्यवस्थाको कर्तव्य हो। व्यवहारबाटै त्यसको जवाफ दिइनुपर्छ, राजनीतिक व्यवस्था, दल र नेताहरूको औचित्यता साबित गर्न सक्नुपर्छ यो हाम्रो दायित्व हो।’
व्यवस्था बदलेका राजनीतिक दल र नेतृत्वसँग जनताले अवस्था बदलियोस् भन्ने अपेक्षा राख्नु सर्वथा गलत नहुने तर्क उनको थियो।
सबै राजनीतिक दल र नेताहरूको ध्यान मुलुकको अवस्था बदल्न आर्थिक तीव्र वृद्धिमा हुनुपर्ने पनि उनले औंल्याए।
पुनले आफ्ना अध्यक्ष पुष्पकमल दाहाल 'प्रचण्ड' नेतृत्वको सरकारले सुशासनका क्षेत्रमा नयाँ र राम्रका कामको थालनी गरेको भन्दै प्रशंसा गरे।
राम्रा कामहरूका कारण सरकारप्रति जनसमर्थन रहेको दाबी पनि उनले गरे।
वर्तमान सरकारले शासन प्रशासनमा जनताको अपेक्षाअनुसार काम गर्ने र सुशासन कायम गर्ने कुरामा सम्झौता नगर्ने बताए।
नेता पुनले आफू नियमित रूपमा राजनीतिक काममा सक्रिय हुने जानकारी दिए।
‘म तत्काल नियमित रूपमा पार्टी काम र जनताको सेवामा सक्रिय हुनेछु। जनतासँग सम्बन्धित, देश, राष्ट्रिय स्वाधीनतासँग सम्बन्धित एजेण्डामा केन्द्रित रहेर काममा लाग्नेछु’, उनले भने।
पुन शुक्रबार चिनियाँ सहर छेन्दुबाट एयर चाइनाको नियमित उडानमार्फत नेपाल आएका हुन्।
पुनका साथमा पूर्वसभामुख एवं उनकी पत्नी ओनसरी घर्ती पनि स्वदेश फर्किएकी छन्।
लामो समयदेखि जटिल प्रकारको वंशाणुगत जण्डिसबाट पीडित पुनलाई स्वास्थ्य अवस्था निकै जटिल बनेपछि गत १ फागुनमा चीन लगिएको थियो।
उनको सेनजेनस्थित थर्ड पिपुल्स अस्पतालमा उपचार भएको थियो।
चीन जाँदा उनको शरीरमा जण्डिसको मात्रा (बिलरुबिन) ४० बिन्दुमा थियो।
चार महिना लामो उपचारपछि स्वदेश फर्किएका पुन तन्दुरूस्त देखिएका छन्।
हाल बिलरुबिनको मात्रा घटेर १.५ बिन्दुमा झरेको उनले बताए।
पुनले आफ्नो उपचारमा पहल गरेको भन्दै प्रधानमन्त्री पुष्पकमल दाहाल 'प्रचण्ड'लाई धन्यवाद दिए।
